Bertsolaritza Kultur Intereseko Ondasun Nafarroan 2018-06-18

Izendapena aurkezteko ekitaldia egingo dute asteazkenean Iruñean

 Ekainaren 6an izendatu zuen Nafarroako Gobernuak bertsolaritza Kultur Intereseko Ondasun. Ana Herrera Kultura, Kirol eta Gaztediko kontseilariak eman zituen azalpenak Nafarroako Gobernuaren asteroko bileraren ondoren. Ondare materiagabekoaren kategoriako izendapena jaso du, honenbestez, bertsolaritzak. Kontseilariak azaldu zuenez, "bertsolaritza Nafarroako kantu inprobisatuaren adierazpiderik nabarmenena eta hobekien kontserbatu dena" da.

 Izendapenaren helburua bertsolaritza bizirik mantentzen laguntzea da. Azken urte hauetan bertsolaritzaren transmisioan egiten ari den lana nabarmendu zuen Kontseilariak, eta baita bertsolaritzak duen "errotzea eta komunitatearen babesa" ere.

 Ekitaldia asteazkenean

 Izendapenaren aurkezpen ekitaldi publikoa egingo da asteazken honetan, arratsaldeko 18:00etan, Nafarroako Museoan. Bertan izango dira, besteak beste, Ana Herrera Kultura, Kirol eta Gaztedi kontseilaria; Julio Soto bertsolaria; Alfredi Asiain irakaslea eta ahozkotasunean aditua eta Gontzal Agote Nafarroako Bertsozale Elkarteko ordezkaria. Ekitaldia irekia izango da, eta, behin bukatutakoan, bertso saio bat egingo dute museoko atarian.