Agenda 2018-07-09

Zortzi saio izango dira Iruñeko San Ferminetan

Zortzi saio izango dira Iruñeko San Ferminetan
Hilaren 8an jaialdia egin zuten Oinez Txokoan. Uztailaren 9an eguerdiz balkoitik balkoirako saioa egingo da eta jaialdia iluntzean; hilaren 10 eguerdian bertso poteoa egingo dute eta iluntzean haurrentzako emanaldia; hilaren 11n libreko saioa eta hilaren 12an haurrentzako emanaldia eta "Ez da kasualitatea" saio musikatua.

 San Ferminak ospatzen ari dira Iruñean egunotan eta festetako egitarauaren barruan, zortzi bertso saio daude iragarrita.

 Hilaren 8an, igandez, iluntzeko 21:00etan bertso jaialdia egin zuten Oinez Txokoan Oihana Iguaranek, Idoia Granizok, Eneko Lazkozek eta Saats Karasatorrek.

 Gaur, eguerdiko 13:30ean, balkoitik balkoira ariko dira Alaia Martin, Julio Soto eta Sustrai Colina La Unica peñan.

 Iluntzeko 19:00etan, berriz, bertso jaialdia egingo dute Eneko Lazkozek, Amets Arzallusek, Xabi Maiak eta Miren Amurizak Sarasate Pasealekuan. Fernando Anbustegi izango dute gidari.

 Bihar, asteartez, bertso-poteo feminista dago iragarrita eguerdiko 13:00etan Errekoletak plazatik abiatuta. Sarai Robles, Miren Artetxe eta Maialen Akizu dira bertan kantatzekoak.

 Iluntzeko 19:00etan, berriz, haurrei zuzendutako "Herriko festetan" emanaldi berezia izango da Sarasate Pasealekuan. Bertsoa, musika, magia eta antzerkia uztartzen dituen emanaldia da. Potx eta Lotx pailazoak ditu protagonista.

 Uztailaren 11n, asteazkenez, bertso saioa egingo dute iluntzeko 21:30ean Zaldiko Maldikon Saioa Alkaizak eta Sustrai Colinak.

 Uztailaren 12an, ostegunez, Irrien Lagunak taldeko Martin Bertso eta Tiritatxo pertsonaiak ibiliko dira Oinez Txokoan arratsaldeko 18:30ean.

 Azkenik, ostegunean bertan, iluntzeko 19:00etan, "Ez da kasualitatea" saio musikatua izango da Sarasate Pasealekuan. Alazne Untxalo, Alaia Martin, Miren Artetxe eta Saioa Alkaiza ariko dira kantuan, Alaitz Rekondo aurkezle dutela. Ixak Arruti eta Gari Otamendi ariko dira musikari lanetan.

Albiste gehiago

Beñat Gaztelurrutia - lankuko Administrazio kontseiluko lehendakaria 2018-06-14

"Lanku jauzi bat emateko moduan dago eta horretan ari gara"