Gazte sariketak 2019-01-21

Saats Karasatorre irabazle Mariano Izeta sariketan

Pasa den ostiralean jokatu zen Nafarroako bertsolari gazteen Mariano Izeta sariketako finala, Elizondoko Arizkunenea kultur etxean, 80 entzuleren aurrean. Saats Karasatorre Etxarri Aranazko bertsolariak jantzi zuen txapela, 246 puntu bilduta. Haren atzetik sailkatu ziren Josu Sanjurjo (242,5), Mikel Lasarte (242), Sarai Robles (231,5), Irati Majuelo (214,5) eta Amaia Elizagoien (211). Lasarterentzat izan zen bertso onenaren saria, koplen ariketan utzitako lehen bi aleengatik.

Bi kanporaketa eta finala izan ditu Mariano Izeta Sariketako VIII. edizioak. Irurtzunen eta Lizarran jokatu ziren kanporaketak. Xabat Illarregik ere finalean behar zuen, baina ezin izan du parte hartu eta Irati Majuelok, sailkapen postuan hurrengoa zenak, kantatu zuen leitzarraren ordez.