Bertsolaritzaren kontrasteak, Hitzetik Hortzeran

Inguru ezberdinetara egokitu behar denari buruz hitz egiterako orduan askotan erabili ohi da kameleoiaren metafora. Bertsolariek, kameleoiak bezala, ingurura egokitzen ikasten dute. Asteburu batean bi saio guztiz ezberdinetan kantatzea suerta dakieke. Horren adibide izango dira aste honetako Hitzetik Hortzera programako bi bertso saioak. Maialen Lujanbio kantuan ikusiko dugu Lasarte-Oriako bertso saio literarioan eta, hurrengo egunean, Astigarragako Ipintza sagardotegiko bertso bazkarian. Nola aldatu azalez hainbestetan eta esentzia mantendu aldi berean?

Maialen Lujanbio, kolore ezberdinetan eroso dabilen kameleoia

Igandeko programan Eider Perez aurkezlea, Maialen Lujanbiorekin elkartuko da. Gaur egun kantuan diharduten bertsolarien artean jendaurrean gehien kantatzen duen bertsolarietako bat da hernaniarra. Zeintzuk izango dira beretzat gaur plazan, bihar aretoan eta etzi sagardotegian gustura eta eroso kantatzeko gakoak? Jakin badakigu bertsolariak ez duela soilik kamaleoiak bezala kolorez aldatzeko lana egin behar. Bertsolariak kolore ezberdin horietan eroso jarduten ikasi behar du. Aste honetan Maialen Lujanbio bertso-saio literarioan kantuan ikusiko dugu afalostean eta hortik ordu gutxi batzuetara sagardotegiko bertso-bazkarian. Gorputzaldi aldaketa hori nola egiten duen jakingo dugu; eta horrez gain, bertsolariak publikoa nola irakurtzen duen ere galdetuko diogu.

Lasarte-Oria eta Astigarragako bertsoaldiak

Hala, bertsolaritzaren kontrasteak bistaratzeko, kontraste handiko bi saio ekarriko ditugu pantailara. Lasarte-Oriako bertso saio literarioan kantuan aritu ziren Ane Labaka, Maialen Lujanbio eta Uxue Alberdi; gai jartzaile lanak Oier Guillan aktoreak egin zituen. Bestalde, Astigarrako Ipintza sagardotegian Zaporeak elkartearen aldeko bertso bazkarian kantuan izan ziren Amets Arzallus eta Maialen Lujanbio.

Hitzetik Hortzeraren 30. urteurrena

Gure programak 30 urte bete ditu eta hori ospatzeko hilero-hilero lehen programa horietako irudiak eta bertsoak berreskuratzen dihardugu. Igandeko programan bigarren atala gogoratuko dugu. Jon Lopategi eta Jon Enbeita Andoainen entzungo ditugu bertsotan. Mutrikuko bertso bazkari batean Imanol Lazkano, Jon Azpillaga eta Roman Maiz “Okelar”. Gainera, Lazkao Txikiren eta Manuel Lasarteren hitzak ere ekarriko ditugu gogora.

Igandean, 15:00etan, Euskal Telebistako lehen katean; eta zuzenean ikusi ezin duenak Internetez ere izango du aukera, EITB Nahieran atarian.