Doinutegia
Aire berriak Txapelketan
Amaia Iturriotzek eta Unai Andak doinu berri bana plazaratu dute Euskal Herriko Bertsolari Txapelketan. Oihana Iguaranek ere aurrez Señora sariketako agurrean estrenatu zuen doinua lehen aldiz erabili du ganbarakoan. Doinu berrien ekarpenaz eta sortzeko prozesuaz hitz egin dugu hiru bertsolariekin. Erreportajea irakurri edo euren ahotsean entzun ere egin dezakezue Bertsoan.
Bertso sariketa
Beñat Gaztelumendirentzat Bilintx saria
Donostiarekin lotura duten bertsolariei zuzendutako sariketa antolatu du bigarren urtez Bilintxi Balantxa elkarteak. Elkarteetan hiru saio egin ostean, mukuru bete zen San Telmo museoko aretoa finalaz gozatzeko.
Bertsolari Bertsozale Podcasta
Josu Txoperenaren bertso oroitzapenak eta gogoetak
Ostiralero ale berri batekin datorkigu Bertsolari Bertsozale podcasta, bertso munduko hainbat lagunek bertsolaritzarekin duten harremanean sakondu asmoz. Josu Txoperena Iribarren da oraingoan protagonista. Lehengusuen eta arreben atzetik bertso eskolan hasia, bertsoa gozamenetik bizi duela dio, anbizio handirik gabe. Herrietan bertso eskolak finkatzearen garrantzia azpimarratu digu. Gehiago jakin nahi izatera entzun Bertsolari Bertsozaleren 135. atala. Podcasten atalean duzue.
Bideopodcasta
Bidegurutzean bideopodcastaren hirugarren atala eskura
Kantatzeaz, kontatzeaz, eragiteaz dator Bidegurutzean bideopodcastaren hirugarren atala. Bertsolaritza eta musikagintzak errealitatea kontatzen dute edo bertan eragin? Artearen zeregina eragitea al da? Besteak beste, galdera horiek plazaratuko dira. Maite Berriozabal Berrizbeitia gai-jartzailea eta Ines Osinaga Urizar musikaria batu dira atal honetan nor bere kultur disziplinatik kantatzeaz, kontatzeaz, eragiteaz jarduteko. Ohi bezala, Onintza Legorburu Larreak egin ditu gidari lanak. Podcasten atalean ikusgai duzue.
EHBT26
Gotainen eta Agurainen kantatuak, Bertsoan eskura
Euskal Herriko Bertsolari Txapelketako lehen faseko azken bi saioak izan ziren Gotaine-Irabarne eta Aguraingoak. Bi saio horien uzta, eta oro har, lehen faseak bertsoz bertso utzi duena eskura duzue. Urriaren 24an itzuliko da Txapelketa finalaurrekoekin.
Berriak
Bertso Erronda2026-10-21
“Finala aurreko saioetatik ezberdina izango da”
Arrakastatsua izaten ari da Bilboko Bertso Errondaren itzulera. Bihar, urriaren 22an da finala 7Katu gaztetxean, 19:30etan. Zortzi baino, bederatzi finalista izango dira Haritz Olaeta antolatzaileak Bertsoa.eus-en zehaztu digunez. Orain arteko balorazioa egin eta finalaren ingurukoak ere azaldu dizkigu.