Iraila iritsi arren, udako bertso errota ez da eten

Gaur bertan, irailaren lehen egunean, Plentzian eta Mutrikun bertso saio bana izango da. Plentzian, Antolin jaien barnean, Elizaren enparantzan egingo da bertso saioa iluntzeko 20:30etan. Aitor Etxebarriazarraga, Alaia Martin, Aitor Mendiluze eta Miren Artetxe izango dira kantuan, Erlantz Ibargurengoitiak gaiak jarrita. Aurrez, Mutrikun, 18:30etan bertsoak hartuko du txiringitoa. Onintza Enbeita, Irantzu Ïdoate eta Xabat Illarregi ariko dira kantuan, Peru Vidalen esanetara.

'Xalbador, Urepeleko artzaina' Getxo Folk jaialdian

Xalbadorren omenezko ikuskizuna Getxon irailaren 13an

Aire Ahizpak taldeak, Xalbadorren bilobak, haren bertsoak kantatuko ditu; Xabier Amuriza eta Amets Arzallus ariko dira bertsotan. Urepeleko bertsolariaren bizitza eta sorkuntza bilduko ditu ikuskizunak, haren heriotzaren 50. urteurrenenean. Irailaren 13an da eta sarrerak salgai daude.

Sariketak

Lizardi sariko finala ostiralean

50. ediziora iritsi da bertsolari gazteei zuzendutako Lizardi saria. Zarauzko bertso-eskolak Zarauzko Udalaren laguntzaz antolatutako ekimenak azpimarratzeko ibilbidea egin du bost hamarkadetan zehar. Aurreko asteetan 16 bertsolarik bi kanporaketa jokatu ostean, ostiral honetan, irailaren 4an jokatuko da finala. 22:00etan izango da Zarauzko Modelo aretoan. Martin Abarrategi, Maddi Aiestaran, Haira Aizpurua, Bittor Altube, Haizea Arana eta Irantzu Idoate ariko dira kantuan. Bertan izango da bertsoa.eus ere