Bizkaiko Bertsolari Txapelketa 2010-12-14

Beñat Ugartetxea: "ea plazako saio baten modura egiten dudan"

 Lehenengo finala izango da larunbatekoa Beñat Ugartetxearentzat. Dena den, txapelketa batean baino gehiagotan hartu izan du parte honen aurretik. Dioenez sari bat da finalean egote hutsa. Ahalik eta gehien lagundu nahi die berarekin kantatuko dutenei.

 Txapelketako saio gehienak jarraitu ditu eta izen berriak deskubritu dituela dio. Bere saioei dagokienez, Getxoko saioa "hotza" iruditu zitzaion. Finalerdietan Gernikan kantatu zuen, eta arraro xamar joan zelakoan dago, saioa berandu hasi baitzen. Horrek mesede egin omen zion, lasaiago kantatu baitzuen. Finalerako helburu bat dauka: "ea plazako saio baten modura egiten dudan".

 Bere entrenamendua orain dela 15 urte hasi zelakoan dago. Larrabetzura joan da entrenatzera gehienbat, Etxahun Lekue, Arkaitz Estiballes eta Fredi Paiarekin batera. Onintza Enbeitarekin ere egin ditu saio batzuk.

• 
•