Bizkaiko Bertsolari Txapelketa 2010-12-14

Etxahun Lekue: "Haize freskoa sartu da"

 Aurpegi ezaguna da Etxahun Lekue Bizkaiko Bertsolari Txapelketako finaletan. Aurtengoa bosgarren finala izango du, eta bere garaian bigarren egina da. Argazki berria dela onartzen du Etxahun Lekuek. Belaunaldi berri bat iritsi da finalera, eta bere belaunalditik ere aurrez inoiz finalean egon gabeko jendea sailkatu da. Horrek "poza" ematen omen dio. Dena den, garbi dauka finalean zer nahiko lukeen: "Nik inork txapela irabaztea nahiko banu nagusietako batek eramatea nahiko nuke".

 Durangoko finalaurrekoan nahiko eroso aritu omen zen, nahiz eta egunik onena eduki ez. Larunbateko saioan ere tenple berarekin aritu nahiko omen luke. Txapelketan orain arte entzundakotik gauza bat nabarmenduko luke: "haize freskoa sartu da". Lehen oso ezagunak ez ziren bertsolari batzuk agertu direlakoan dago, finalera iritsi ez arren bertsokera freskoa agertu dutenak eta publikoaren gogoan gelditu direnak: Mikel Goiriena, Julen Sololuze, Eneko Arrate... Edozein plazatan maila eman dezaketela uste du.

 Aurtengo txapelketa prestatzeko astean behin batu omen da Arkaitz Estiballesekin, Fredi Paiarekin eta Beñat Ugartetxearekin. 

• 
•