Jai-Alai pilotalekuan 2014-03-25

Distantziak laburtu nahian

"Etxean nahi ditugu" lelopean antolatu zuen bertso-jaialdia Etxeratek. Dotore prestatu zuten Gernika-Lumoko Jai-Alai pilotalekua ekitaldirako.

Jendetsua izan zen. Jendetsua oholtzan eta jendetsua oholtzaren aurrean. Zortzi bertsolari kantuan: Iratxe Ibarra, Etxahun Lekue, Onintza Enbeita, Fredi Paia, Miren Amuriza, Arkaitz Estiballes, Oihana Bartra eta Unai Iturriaga. Kartela bikaina, baina agian gehiegi ordu t'erdiko jaialdirako. Bertsolariek ez ote zuten nahikoa denbora izan saioari tenperatura hartzeko...

Josu Goikoetxeak egin zituen gai-jartzaile lanak. Betiko moduan, denetariko gaiak, ederki egituratuta eta hobeto aurkeztuta. Umoretik eta seriotik. Bakarkako lanak, ofizioak eta taldeko ariketak.

Arkaitz Estiballesek oso saio ona egin zuen.  "Distantzia" hitzari jarri zizkion hiru bertso eta ofizio ederrak osatu zituen Miren Amurizarekin eta Unai Iturriagarekin. Miren Elisa emakumearen ahotik eta Arkaitz Elizarenetik; eta azken asteetan zeresana ematen ari den "8 apellidos vascos" fimari buruz kantatu zuen Unairekin.

Bertsoaldi umoretsuena Miren Amuriza eta Unai Iturriagak eskaini zuten. Atzekoen estetika hobetu nahian Miren Amurizak eguneroko bizimodurako aholkuak eman zizkien: dieta, ohiturak... Unaik zuzenean zirujiara jo zuen.

Xabier Amuriza ere igo zen oholtzara eta bere bertso-jarri batzuk abestu zituen, ondo abestu ere.

• 
•