Txapeldunen bertso-saioa 2011-10-13

Txapeldunak Gasteizen

Jende asko elkartu zen Jimmy Jazz aretoan pasa den ostegunean. Iluntzeko 8etan ireki zituzten ateak eta ordurako jende-ilara luzea zegoen kalean aretora sartzeko zain. Antolatzaileek jarritako aulkiak beterik, eta aretoaren goiko eta beheko solairuetan bertsozaleak zutik.  

Urtero antolatzen du Arabako Bertsozale Elkarteak txapeldunen saioa, eta urtero izaten da arrakastatsua; eta ez da arrazoi faltarik. Saio polita izan zen, freskoa. Bertsolariak fresko eta baita bertsozaleak ere, garagardo-botilak eskuetan zituztela.

Ez zen zortzi bertsolarien artean inor nabarmendu besteen gainetik, denak aritu ziren ondo- Dena dela, aipatu behar Aitor Mendiluzeren agurra. Izan ere,  lau urtez jarraian Gasteizen abestu ondoren hurrengo urtean ez baita han izango, ez du-eta aurtengo Gipuzkoako Txapelketan parte hartu. Itzuliko ote da noizbait?

Bertsoa.com han izan zen eta hemen dituzue bertsoaldi onenak ikusgai.