Markina-Xemeinen 2013-10-02

Euskal Herriko Bertso Eskolen Eguna ospatuko da larunbatean

 Larunbat honetan Bertsolari Txapelketa Nagusiko bigarren kanporaketa jokatuko da Markina-Xemeinen. Horrez gain, Euskal Herriko Bertso Eskolen Eguna ere ospatuko da herrian, egun osoko egitarauarekin. Gaur egun Euskal Herriko 125 herritan daude bertso-eskolak eta 1 700 lagun elkartzen dira horietan. Bertso Eskolen Egunaren helburua horien arteko harremanak estutzea da. Urtero bertso-eskola bati egokitzen zaio ospakizuna antolatzea eta aurtengoan Markina-Xemeingo bertso-eskola ariko da antolaketa lanetan.

 Bertso-eskolen inguruko informazio gehiago nahi izanez gero egin klik hemen.

 Egun osoko egitaraua

 Egun osoan zehar izango da zerekin gozatua. Hasteko, eguerdiko 13:30ean elkartuko dira bertso-eskolak Uhagonen. Ondoren, 14etan, bazkaria egingo da gaztetxean, Mungiako bertso-eskolaren emanaldiak girotuta. Behin bazkaria bukatutakoan, Bertsolari Txapelketa Nagusiko kanporaketa izango da 17:30etan. Bertan kantatuko dute Agin Laburuk, Arkaitz Estiballesek, Beñat Ugartetxeak, Eneko Fernandezek, Jone Uriak eta Onintza Enbeitak. Behin saioa bukatutakoan, poteoa egingo dute Andrabanda Feministarekin eta herriko bertso-eskolakoen esketxekin. Azkenik, berriz ere gaztetxera itzuliko da jaia. Gaueko 23etan "Bi Bala" taldeak emanaldia eskainiko du. Ondoren, "Fan & Go"-ren erromeriak borobilduko du ospakizuna.

 Nahi izanez gero oraindik ere lortu daitezke bazkaritarako sarrerak 10 eurotan www.bertsosarrerak.eu webgunean. Gaur da sarrerak hartzeko azken eguna. Horrez gain, lotarako leku eskaria ere egin daiteke bertsoeskolak@gmail.com helbidera idatzita.

• 
•