Bertsoa oinarri duen ikuskizun berria 2024-02-21

Itzal(iko) bagina: Zeharkatu gaituena performatzen

Bertsoa oinarritzat duen antzerki ikuskizun berria dakarte Janire Arrizabalaga, Izaro Bilbao eta Araitz Katarainek, Lokatz Loreak sormen taldeko kideek, Iraitz Lizarragak zuzenduta:  Itzal(iko) bagina: Zeharkatu gaituena performatzen. Bertsoz, bertsotik haratago doazen auziei erantzuna eman nahi die ikuskizunak.

Asmo nagusia, «egungo jendarte indibidualistari kritika egitea da, kolektiboaren aldarrian». Generoaz, familiaz, osasun mentalaz, meritokraziaz… jardungo dira pertsonaiak. «Malgu, ahul eta haragizko aurkeztuko dira fokopean. Bertsoa gidoiaren oinarritzat izan arren, haren estrukturetatik aldentzeko ahalegina egingo da».

Lokatz Loreak sormen taldeak duela bi uda egin zuen haren lehen agerpena, Friki Saioak proiektua aurkeztu zuenean. Jasotako harrera beroaren ondoren, Bertsolari Txapelketa Nagusiari buruzko tira komikoak bezalakoetan ibili dira. Orain, gogoz datoz aurretik arakatu gabeko lurretan haien alea uzteko. Antzerkiari bertsotik emateko eta bertsotik antzerkiari.

Aurrestrenaldia martxoaren 22an Loraldia eta estreinaldia apirilean
Itzal(iko) bagina k Loraldian izango du aurrestreinaldia, martxoaren 22an, Terminal1n, 19:30etan. Estrainaldia Berrizen, apirilaren 13an, kultur etxean, 19:30etan. Ondoren, maiatzaren 5ean Amasa-Villabonan Gurea Antzokian, 19:00etan eta maiatzaren 25ean Lemoan, Kotxepin kultur etxean 20:00etan.