Bertsolamintza gogoeta saioa gaur Bilbon 2024-03-14

Libreko bertsogintzaz ariko da Irazu eta botere harremanaz Enbeita, gaur Bilbon

Bertsolamintza gogoeta jardunaldiko bigarren saioa izango da gaur Bilbon. Bi hitzaldi izangod dira. Lehenik, Jexux Mari Irazu Libreko bertsogintzaren kokapena, aukerak eta mugak aletuko ditu: «Txapelketak eta jaialdiek ardaztutako bertsolaritza aldi luze honetan, behar bada, plazan bertso gehienak librean kantatzen dira oraindik ere. Libreko formatuaz baino libreko jardunaz ari naiz. Erabat librekoa edo hortik gertukoa. Saioen hirutik bat librekoak dira eta ia hirutik bi lagunartekoak batuta, non libreko jardunak presentzia handia duen. Lanketa honetan bertsogintza modu honen kokapena, presentzia, aukerak eta mugak aletuko ditut».

Ondoren Onintza Enbeitak Boteren harremanen inguruan gogoetatuko du: Botere harremanak: Bertsolariaren itzalaren eta generoaren eragina bertsoaren balioespenean

«Bertsolariak plazaz plaza egiten duen bidean hiru osagaik elkar eragiten dute etengabe: bertsolariak, bertsokideek eta publikoak. Hiruren artean botere-harremanak sortzen dira; bertsolaritza ez dago horretatik salbu. Jakina, bertsolariaren itzalak eta generoak eragina dute harreman horien sorkuntzan, baita ere bertsolariaren sorkuntzari ematen zaion garrantzian.
Generoaren eraikuntzaz eta eraginaz asko hitz egiten dugun arren, bertsolariaren itzalaren eraikuntza ere ez da ausazkoa. Zerk autorizatzen eta desautorizatzen du bertsolaria? Harremanak modu horizontalagoan eraiki nahi baditugu, deseraiki egin beharko dugu itzala orain arte ulertu dugun moduan».