Bertsularien Lagunak elkartearen eskutik 2024-10-02

Errexil Sariketako finala ostiralean Urruñan

Errexil Sariketako finala jokatuko da ostiral honetan Urruñan. Aurrez bi kanporaketa jokatuta, honako sei bertsolari hauek ariko dira kantuan: Aissa Intxausti, Eneko Lazkoz, Miren Artetxe, Eneko Abasolo Abarkas, Maddi Sarasua eta Ramuntxo Christy.

Finala datorren ostiralean izango da, urriaren 4an, Urruñan, Postako Gelan, 19:00etan. Txapeldunari Errexil bertsolariaren seme den Jean Louis Eizmendi "Errexil II" ak jantziko dio.

Belaunaldi arteko sariketa berria
Belaunaldi arteko sariketen bidean urrats berri bat ematera dator Errexil Sariketa, Bertsularien Lagunak Elkartearen eskutik. Berez duela 40 urte antolatu zen lehenengoz gazte sariketa gisa eta bi-hiru edizioren ondoren bertan behera gelditu zen. Urteurrena baliatuz, sariketa hura berpiztu du Bertsularien Lagunak Elkarteak filosofia berri batekin.

«Plazan hainbeste ez dabiltzan bertsolari onak»
Ortzi Idoate Bertsularien Elkarteko Sustapen eragilearen esanetan plazan hainbeste ez dabiltzan bertsolarientzat aukera gisa planteatu da sariketan. «Orain arte Hernandorena egiten dugu gazteentzat baina adin horretatik aurrera doazenentzat ere bideak landu behar direla uste dugu» adierazi du. Hernandorena Sariketako irizpide nagusiak mantentzen dituzte eta belaunaldi artekotasuna erantsi. Parte hartze paredikidea du eta erdiak Iparraldekoak dira. «Plazan hainbeste ez dabiltzan bertsolari onak» dira 12 bertsolariko zerrenda osatu dutenak: herrialdeko txapeldun bat, herrialdeetako bi txapeldunorde eta herrialdeetako finalistak gehienak.

«Bertsolariek oso gustura eta ilusioz hartu dute gonbita»
Belaunaldi arteko sariketaren proposamenak oso harrera ona izan du bertsolarien artean. Hala adierazi du Idoatek: «Bertsolariek oso gustura eta ilusioz hartu dute gonbita. Askok elkarrekin kantatzeko aukera askorik ez dute izaten eta Iparraldean kantatzeko ere ez».