Pausuko saioaren laburpen bat eskainiko dute 2009-11-04

"Elkartasunez Tour" ekimenaz ariko da Hitzetik Hortzera

 "Elkartasunez Tour" ekimena antolatu du Askapenak, artista euskaldun eta palestinarrak elkartuz. Tartean, bertsolariek ere hartu dute parte. Joan zen larunbatean bertso-afaria egin zuten Pausun, eta honako hauek kantatu zuten:

 Amets Arzallus
 Miren Artetxe
 Ahmad Nanmanah
 Muhammad Zoabi

 Hitzetik Hortzerako kamarak saio horretan izan ziren, eta aste honetan laburpen bat emango dute. Horrez gain, beste bi saio ere izango dira ikusgai. Alde batetik, joan zen ostegunean Iruñean egin zena, Bertsoaroaren barruan. Nafarroako Bertsozale Elkartearen 25. urteurrena ospatzeko antolatu zuten emanaldia, eta honako bertsolari hauek kantatu zuten:

 Saioa Alkaitza
 Xabier Silveira
 Xalbador Madariaga
 Bittor Elizagoien
 Manolo Arozena
 Julen Zelaieta

 Beste aldetik, Gaztezuloren omenezko festan izan zen emanaldia ere izango da ikusgai. Rapa eta bertsoa aurrez aurre jarri zituzten saio horretan. Xabier Silveira eta Iñaki Viñaspre aritu ziren bertsotan. Beraiekin batera aritu ziren Maisha MC, Endika Lahaine eta lagunak.

 Aste honetan Anjel Mari Peñagarikanok bisitatuko du erredakzioa. Aspaldiko kontuez eta aurtengo Txapelketa Nagusiaz ariko dira hizketan.

 Azkenik, ohiko atalak izango ditu programak: zuri-beltzekoa, bertso surrealista, artxiboko zappinga...

 Aurten ere astean bi egunetan emititzen da Hitzetik Hortzera. Ostegunez ETB3n ikusi ahal izango da, gaueko 22etan. ETB1en, berriz, larunbatetan emititzen dute, eguerdiko 13etan. Gainera, saioko edukiak eitb.com-en ikus daitezke ostiraletik aurrera.

• 
•