Ainhoa Agirreazaldegi 2009-11-13

"Helburua saio horretan barruan daukadanetik pixka bat ematea da"

 Ainhoa Agirreazaldegirentzat bigarren Txapelketa Nagusia da aurtengoa: 2001ekoan lehenengo fasean kantatu zuen. 2007ko Gipuzkoako Txapelketan finalaurrekoetara iritsi ondoren, gauza bera egin du aurtengo Euskal Herrikoan ere. Berari gustatuko litzaioke beste saio bat ere edukitzea, "barruan daukadana emateko", baina lehenengo fasean baino presio gutxiago somatzen omen du. "Nik txapelketan ez daukat puntuazio edo postu bati lotutako helbururik, beste motibazio batzuk dauzkat."

 Biharko saioari begira, "nahiko zentratuta" ikusten du bere burua. Leitzako saiotik hona izan duen tartean beste saioak jarraitu omen ditu. "Oso bertsokera anitza ikusi da, bertsolari guztiak molde berekoak gerala esaten dutenei erantzun grafikoa eman die txapelketak. Bertsolari bakoitzaren nortasuna ikusten da atzean. Ni neu Maialenek Bergaran zeukan tenple horrekin gelditzen naiz, neurri eta errimetatik haratago zihoan ahalegin hori asko estimatu nion."

 Finalaurrekoetan ariketa berri bat izango dute bertsolariek: kopla bikoitz hautsia. " Gustatzen zait, baina ez dakit behar beste denbora eduki dudan horretara jartzeko."

 Bihar oholtzan izango dituen kantu-lagunekin "gustura" dago. "Uxue Alberdi eta Iñaki Gurrutxaga oso gertukoak ditut, bertso-eskolan batera ibiltzen gara. Eta besteak ere kategoria handiko bertsolariak dira".

• 
•