Elizondon jokatu da finala 2008-03-15

Julen Zelaieta Nafarroako txapeldun berria

Sailkapena
Julen Zelaieta 418
Jon Barberena 409.5
Julio Soto 408
Erika Lagoma 403
Xabier Terreros 401
Xabier Legarreta 397
Miel Mari Elosegi 370,5
Iñigo Olaetxea 369.5

Aurten ere, Nafarroako bertsozaleek lepo bete dute Elizondoko Lur aretoa,  herrialdeko bertsolaritzaren festa handiaz gozatzeko. Aurtengoan inkognita handia zegoen Xabier Silveiraren ondorengoa nor izanen zen jakiteko. Ez zegoen pronostiko garbirik, baina ez ziren asko Julen Zelaietaren alde egiten zutenak. Hala ere, Berako bertsolariak jarraitzaile asko ditu eta horrexegatik pozez hartu du Lur aretoak Zelaietaren garaipena.
Beratarra indartsu ekin dio saioari, eta berehala erakutsi du bere bertsogintza ez dela umorearen esparrura mugatzen. Zortziko txikian eta handian oso ongi aritu da, eta lortutako abantaila mantentzen jakin du Zelaietak. Kartzelako gaian ezusteko bidetik jo eta txapela poltsikoratu du.
Jon Barberena txapeldunordea zen eta begi asko berarengan zeuden jarrita. Akaso horregatik tentsioa sumatu du Erratzun bizi den Elizondoko bertsolariak, eta makal samar hasi du saioa. Hala ere, gora egin du saioak aurrera egin ahal eta azkenean iazko bigarren postuarekin konformatu behar izan du.
Finaleko gazteena zen Julio Soto. Iruñean bizi den bertsolari gorritiarrak saio erregularra egin du, eta oso txukun bukatu kartzelakoan. Bigarren postua eskura izan du, baina azkenean hirugarrenarekin konformatu behar izan du.
Baina finaleko lehia ez da lehen hiru postu horietara mugatu, gainerako bertsolariak ez dira podiumetik oso urrun ibili. Laugarren Erika Lagomak egin du, bigarren eta hirugarrenetik oso gertu betiere. Eta bosgarren, hainbat urtez Txapelketan parte hartu gabe egon den Xabier Terreros lesakarra. Txapelketara aurten ere itzuli den Xabier Legarretak seigarren egin du.
Zertxobait atzerago gelditu dira aurtengo finalean parte hartu duten beste bi bertsolariak. Gripeak jota kantatu duen Migel Mari Elosegi “Luze”rentzat izan da zazpigarren postua eta zortzigarrena, berriz, Iñigo Olaetxearentzat.
Txapelketan parte hartu duten guztiei –bertsolari, babesle, laguntzaile, erakunde eta bertsozaleei- eskerrak eman ostean, sari banaketa egin da. Bertsolari bakoitzak bere saria jaso eta agurreko bertsoa egin du. Julen Zelaietak Iñaki Murua Euskal Herriko Bertsozale Elkarteko lehendakariaren eskutik jaso du trofeoa eta Manu Legarrak bertsozale beteranoak jantzi dio txapela. Hura jantzita, oso hunkituta, txapela lortzeko bidea egiten lagundu duten guztiei eskaini die.