Atera da udarako zenbakia 2010-09-02

Bertsolari aldizkariak bertsoa eta generoa aztertu ditu 78garren zenbakian

Bertsolari aldizkariaren 78garren zenbakia kalean da, hiru gai nagusirekin: Bertsoa eta generoa, Pello Mari Otañoren mendeurrena eta Fernando Amezketarrari buruzko erreportaia. Bertsoa eta generoaren gaian, Jone Miren Hernandez antropologoak bere ikerketa proiektuaren berri ematen du, Maider Iantzik egindako elkarrizketa zabal batean. Jone Miren Hernandez EHUko irakasle eta ikertzailea da. Azken urteetan bertsolaritzaren munduan murgildu da bertsolaritza eta generoa aztertzeaz gain, proposamen praktikoak egiteko asmoa ere badu. Txapelketak, bertso-eskolak eta bertsolaritzaren periferia izango dira bere azter-eremu nagusiak. Ikerketa horren berri plazaratzeaz gain, Beñat Gaztelumendik Nagore Soroari egindako elkarrizketa, eta Argia Astekarian Uxue Alberdik Ainhoa Agirreazaldegiri egindakoa ere jaso ditu Bertsolari Aldizkariak edizio honetan.

Aurten bete dira 100 urte Pello Mari Otaño zizurkildarra hil zela eta bere jaioterrian ekitaldi ugari egin dira bertsolariaren oroimenez. Hori guztia ere biltzen du Bertsolari Aldizkariak. Joxean Agirre eta Beñat Gaztelumendiren artikuluez gain, hiru elkarrizketa dakartza ale honek:  Amelia Otaño eta Susana Ardanaz Otaño, Pello Mari zenaren bilobei egina, eta Egoitz Zelaiak Cesar Arrondo La Platako Unibertsitataeko ikerlariari egina.

Azkenik, Pernando Amezketarrari buruzko gaian, Jose Mari Oterminek Pernandori buruzko ikerketa argitaratu du, non Pernando Amezketarraren irudi errela eman nahi izan duen. Pako Aristik elkarrizketa luzea egiten dio Otermini, eta Garikoitz Bernares arkitekto gaztearen Pernando Etxea proiektuaren berri ere jasotzen du.

• 
•