Onintza Enbeita egongo da platoan 2011-02-25

Muxika, Añorga eta Erronkariko saioak emango dituzte Hitzetik Hortzeran

 Aste honetan ere Hitzetik Hortzera programa ikusi ahal izango da ETB1en. Igande iluntzean egongo da ikusgai, iluntzeko 21etatik aurrera.

 Astero bezala, bertso-saio bat baino gehiago eskainiko dituzte. Batetik, Muxikan Julio Sotok eta Onintza Enbeitak egindako bertso-afariko irudiak izango dira ikusgai. Eskola zaharrean egin zuten saioa, eta bertan hasi zen Onintza Enbeita bertsotan. Kontu horiek guztiak berrituko ditu Hitzetik Hortzerako platoan. Gainera, Zappingerako materiala ere berak eramango du, orain dela 36 urte enbeitatarren familia ospakizun batean hartutako irudiak emango baitituzte.

 Bestalde, joan zen ostiralean Añorgan jokatu zen Orixe Sariko lehenengo kanporaketako bertsoaldi onenak ere emango dituzte. Honako bertsolari hauek kantatu zuten bertan:

  Jokin Uranga
  Nahikari Gabilondo
  Felix Zubia
  Joxe Munduate
  Iñaki Zelaia
  Oihana Bartra

 Erronkarin bertso-afaria egin zuten orain dela bi aste Jon Barberena, Ion Ansa eta Iñaki Gurrutxagak, eta bertako bideoa ere bidali dute programara.

 Azkenik, Bertsoa.com-etik Lezoko bertso-saioko irudiak hartu dituzte. Honako bertsolari hauek kantatu zuten bertan, Naroa Sasietaren esanetara:

  Andoni Egaña
  Iker Zubeldia
  Ander Lizarralde
  Agin Rezola

 Ohiko ataletan, Zuri-Beltzekoan 1973ko irudiak izango dira ikusgai. Urte horretan Bergaran Xalbaror eta Mattin petrolioaren krisiari buruz aritu ziren kantuan.

• 
•