Bertsoz apainduko dute 2011-06-15

Gaur berriz inauguratuko dute Sariketa taberna

 30 urtez bertsolari zaharren bertsoz apaindurik egon da Donostiako Sariketa taberna. Basarri, Uztapide, Xalbador, Otaño, Txirrita, Lazkao Txiki... Dena den, eraberritze lanen ondorioz itxita egon da azken asteetan. Gaur berriro zabalduko dute, eta bertsoak izango du bere lekua. Hala, 30 bertsolarik 30 lekuri ipinitako bertsoek apainduko dute taberna. Donostiari lotutako argazkiak dira denak: Zinemaldia, estropadak, angulak, Trinitate plaza, su artifizialak, Haizearen Orrazia... Denak ageri dira irudietan. Bertsoak jartzen, berriz, adin guztietako bertsolariak aritu dira: Joxe Agirre, Maialen Lujanbio, Jon Maia, Andoni Egaña, Imanol Lazkano, Beñat Gaztelumendi, Anjel Mari Peñagarikano... Gaurtik aurrera bertaratzen duenak ikusgai izango du Donostiako Alde Zaharrean, Fermin Kalbeton kalean.

 Lanku Bertso Zerbitzuak eta Bertsozale Elkartea aritu dira panelak osatzen. Hala, Eneko Salaberriak egin du diseinua, Gari Garaialderen argazkiek lagunduta. Ideia nagusia, berriz, Unai Elizasurena izan da.

• 
•