Euskal Jaiak Donostian 2011-09-13

Ongi etorri Trinitatera

Urte batzutako hutsunearen ondoren, Trinitate plazara itzuli da Donostiako Euskal Jaietako bertso-saioa. Tradizio handia du Kontxako banderaren bezperako bertso-saioak Donostian; Trinitate plazaren konponketa-lanak hasi zirenean, handik Konstituzio plazara eraman zuten saioa, eta aurten itzuli da plaza goxora.

Goxoa, horrelakoxea izan zen bertso-saioa. Plaza txikian, bertsolariak eta entzuleak gertu, bertsolariak eroso eta entzuleak esker onez. Igor Elortzak bukaerako agurrean esan zuenez, pribilegiatua sentitzen zen oholtza gainetik ikusten zena ikusi zuelako. Bete-bete egin zen plaza, bertsozaleak aulkietan eta bertsozale gehiago bazterreko harrizko eserlekuetan eserita. Gau-giro ezin hobea bertsoak entzuteko.

Egoera horretan, oso erraza zen bertso-saiotik gustura ateratzea; baina ezin kenduko diegu meriturik bertsolariei. Izan ere, eszenatokia bikaina izateaz gain, bertso-saioa bera ere ona osatu baitzuen seikoteak. Seriotik hasi zen saioa baina segituan heldu zien umoreari. Aipatzekoa Jon Maiaren lana, gustura zegoen oholtzan eta nabaritzen zitzaion. Maialen Lujanbiorekin osatu zuen bertsoaldia oso ona, Zinemaldian "Bertsolari" pelikularen estreinaldirako prestatzen ari zirela; baita Jon Maiak atzekoei erantzunez egin zuten saioa ere.

Badu definitzen erraza ez den zerbait Trinitate plazak; argi dagoena da gertutasun eta goxotasun horrek ez diola kalterik egiten bertsoari.