Urriaren 3ra arte aurkeztu daitezke lanak 2011-09-27

Martxan da Balendin Enbeita bertsopaper lehiaketa

 Bi urtetik behin egiten den lehiaketa da Balendin Enbeita bertsopaper lehiaketa. Bertso-jartzaile sena pizteko asmoz antolatu ohi du Algortako Bertsolari Eskolak. Aurtengoa 10. edizioa izango da.

 Bi kategoria bereizi dituzte. 18 urtera artekoek gutxienez 6 bertso idatzi beharko dituzte, eta gehienez 10, gai, doinu eta neurri librean. Sariei dagokienez, irabazleak txapela, 300 euro eta garaikurra eskuratuko ditu, bigarren geratzen denak 150 euro eta garaikurra eta hirugarren geratzen denak 90 euro eta garaikurra.

 19 urtetik gorakoek, berriz, gutzienez 8 bertso idatzi beharko dituzte eta 12 gehienez, gai, doinu eta neurri librean. Sari mardulagoak izango dituzte: txapela, 1200 euro eta garaikurra irabazleak; 900 euro eta garaikurra bigarrenak eta 600 euro eta garaikurra hirugarrenak.

 Partehartzaile bakoitzak nahi adina sorta bidaltzeko aukera edukiko du, baina ezingo du sari bat baino gehiago jaso. Lanak bidaltzeko epea URRIAREN 3an bukatuko da. Sortak posta arruntez edo elektronikoz bidali ahal izango dira.

 Posta arruntez bidali nahi izanez gero, bertsopaperak izengoitiz sinatu beharko dira, eta beste gutunazal batean idatzi beharko dira egilearen izen-abizenak, jaioteguna, helbidea, eta telefonoa, faxa edo e-maila. Gutunazal hau ere izengoitiz sinatu beharko da. Honako hau da helbidea:

 BALENDUN ENBEITA 10. SARIA
 Algortako Bertsolari Eskola "ALBE"
 Martikoena 16, 2. pisua
 48992 Getxo

 
 Posta elektronikoz bidali nahi izanez gero, bi dokumentu bidali beharko dira: batean bertsopaperak eta izengoitia eta bestean norberaren datuak. Hau da helbidea: balendinenbeita2011@gmail.com.

 Sari-banaketa Algortan izango da, Villamonteko Kultur Etxean, Ahobien Galaren barruan.

• 
•