Balmasedan, Durangon eta Bilbon 2011-10-13

Gaur ere saio bat baino gehiago izango da

 Osteguna izan arren bete-betea dator bertso-agenda gaurkoan. Hala, Balmasedan "Hiru, bi, zast... egizu jolas!" emanaldi bereziaren saio bikoitza izango da, goizeko 9:30etan eta 11etan, Klaret antzokian. Haurrei zuzendutako emanaldia da, Ibai Esoain, Hodei Unzueta, Alex Tello eta Ainhoa Alberdi protagonista dituena. Honako hau da laburpena: "Zertara jolasten dira gure haurrak kalean? Zertara baliabiderik eskaintzen ez bazaie? Zertara, zertara, zertara… Lehengo harrapaketak , txabola egiteak bukatu dira.. gaur, zertan jolastu ezin asmaturik ibiliko dira Ander, Ximon eta Lide. Halako batean baina, bapatean, jeinu bat irteten da eta jolasean jarriko ditu. A ze zortea hirukote onena! Emanaldiaren funtsa horixe da neurri batean. Ikustera joango diren haurrak, ezagutu dezatela hitzekin jolasteko aukera berri bat. Koplak asmatuz, hitzak bilatuz, irudimena landuz…". Hala, emanaldian bertsoa, koplak, txotxongiloak eta antzerkia uztartuko dituzte.Hemen klik eginda Hitzetik Hortzeran egindako erreportajea ikus daiteke.

 Durangon, berriz, iluntzeko 19:30etan izango da saioa, Udaletxe plazan. Igor Elortza, Miren Amuriza eta Amets Arzallus ariko dira bertan kantuan.

 Azkenik, Bilbon "Erregea eta Bufoia" izango da ikusgai Berregienen museoan, iluntzeko 20etan. Andoni Egaña ariko da bertsotan, eta bere ondoan izango du Ander Lipus. Unai Elizasuk jarriko dizkie gaiak.

• 
•