Bertso-saio esperimentala Bilbon 2011-10-21

Bertsoa teknologia berriekin uztartuz

Bertso-saio berezia egin zuten atzo Bilboko Alhondigan. Azken urteetan teknologia berriek izugarrizko protagonismoa hartu dute gure eguneroko bizitzan eta bertsogintza ez da salbuespen izan. Atzo ondo erakutsi zuten bertsoalariek ere gaitasuna badutela aurrerapen teknologikora egokitzeko. Unai Iturriaga, Onintza Enbeita, Amets Arzallus eta Aitor Sarriegi aritu ziren bertsotan; eta Josu Goikoetxea gai-jartzaile lanetan.

Unai Iturriaga, Onintza Enbeita eta Amets Arzallus bertsolariak igo ziren oholtzara; eta Aitor Sarriegi etxetik aritu zen bertsotan webcam baten bidez. Oholtzaren atzeko pantaila handian ikusten genuen guk Aitor. Hori izan zen lehenengo ezustekoa.

Pantailan ordea ez zen Aitor bakarrik ageri. Bertso-saioa zuzenean eskaini zuten interneten streaming bidez eta saioa etxetik jarraitu zutenek Twitter bidez hartu zuten parte emanaldian. Twitterrean egindako komentarioak pantaila handian irakurtzen genituen eta komentario horiek behin baino gehiagotan erabili zituen Josu Goikoetxea gai-jartzaileak bertsolariei gaia jartzeko aitzakitzat.

Kameradun betaurrekoak, Wii jolasak, Facebook, Tuenti, Twitter... ez dira bertso-saioetan entzun ohi diren hitzak; baina atzo nahiko eroso ikusi genituen bertsolariek teknologia berrien zurrunbiloan; eta erakutsi zuten beste behin bertsogintzak testuinguru berrietara egokitzeko duen gaitasuna.

80 lagun inguru elkartu ziren atzo Alhondigako Bastida aretoan. Bertsoa.com ere han izan zen eta hemen dituzue atzoko bertsoaldi onenak.