Bertsoaroa Iruñean 2011-10-28

Gazteen freskotasuna

Atzerapenarekin hasi zen saioa eta bertsolariak oholtzara igotzerako nahikoa beteta zegoen Iruñako Gurutze plazako institutuko areto nagusia. Adin guztietako bertsozaleak gerturatu ziren bertsolari gazteak entzutera; eta ez Iruñatik bakarrik, baita inguruko herrietatik ere.

Gazteak ziren bai atzo Iruñako Bertsoaroko oholtzara igo ziren bertsolariak; 27 urte ditu zaharrenak, hortik atera kontuak. Bertsolari gazte hauek euren lekua egiten ari dira bertso-munduan, eta emango dute zeresana hemendik aurrera.

Miren Amuriza bizkaitarra, Ander Solozabal arabarra, Aimar Karrika nafarra, Odei Barroso lapurtarra, Joanes Etxebarria xiberutarra eta Ane Labaka gipuzkoarra aritu ziren kantuan. Ohartuko zinetenez, Euskal Herriko lurralde bakoitzak bazuen bere ordezkaria oholtzan eta Sustrai Colina ez zen egoera hori aprobetxatu gabe geratu. Euskararen aberastasunetako bat da euskalkia bera, eta Sustrai Colinak elkarri puntuak jartzeko agindu zien Miren Amuriza, Ander Solozabal, Joanes Etxebarria eta Aimar Karrikari baina bakoitzak bere euskalkian. Ariketa polita osatu zuten lau bertsolariek.

Aurtengo Bertsoaroko hirugarren ekitaldia izan zen atzoko bertso-saioa eta esan dezakegu oraindik hasi besterik ez dela egin. Oraindik beste bi bertso-saio eta poema-errezitaldia izango dituzte datozen asteetan.