Estitxu Fernandez izango da aste honetako gonbidatua 2012-02-10

Bilbo eta Iturengo saioak eskainiko ditu Hitzetik Hortzerak

 Aste honetan ere bete-betea dator Hitzetik Hortzera programa. Bi bertso-saiok beteko dute tarterik zabalena. Alde batetik, joan zen ostegunean Bilboko Alhondegian egindako bertso-saio esperimentala eskainiko dute. Unai Elizasuk eta Asier Altunak ikus-entzunezko pieza laburren bidez jarri zizkieten gaiak Maialen Lujanbio, Igor Elortza eta Aitor Mendiluzeri. Emanaldi hartako unerik onenak emango dituzte aste honetan.

 Bestetik, joan zen larunbatean Iturenen egindako bertso-bazkariaren momentu gozagarrienak ere izango dira ikusgai. Ihauterien barruan eta elurretik babesean giro ederreko bertso-bazkaria osatu zuten Julio Soto eta Andoni Egañak.

 Aste honetan Estitxu Fernandez Maritxalar psikologo eta kazetari lesakarra gonbidatu dute platora. Nafarroako Bertsozale Elkarteak antolatutako Bardoak 2012 taldekako txapelketan hartuko du aurten. Horretaz eta beste hainbat gauzaz ariko dira programan.

 Ohiko atalak ere izango ditu programak. Zuri-beltzeko "Auspoa" atalean Eneritz Zabaletak aukeratu eta komentatutako pasartea irakurriko dute Xalbadorren "Odolaren mintzoa" liburutik. Zappingean Imanol Lazkano izango da protagonista, Lazkao Txikiren ateraldi bat kontatuko baitu. Bukatzeko, Bertsoa.com-etik Zeanuriko bertso jaialdian egindako zirkuko jokoa aukeratu dute.

 Astero bezala larunbatez izango da programa ETB1ean, eguerdiko 14:45ak aldera. Nahi izanez gero aurretik ikusgai jarriko dute eitb.com/nahieran atarian.

• 
•