Euskal Herriko Bertsozale Elkarteak eta AEKren Mintzapraktika egitasmoak antolatuta 2012-02-15

Martxan dago Bideokopla Txapelketa

 "Euskalakari Koplari" lehiaketa antolatu zuten iaz Euskal Herriko Bertsozale Elkarteak eta Korrikak. Orduko arrakasta ikusita, aurten berriro ere antzeko lehiaketa bat antolatzea erabaki dute. Oraingo honetan AEKren Mintzapraktika egitasmoa izango du bidelagun Euskal Herriko Bertsozale Elkarteak. Lehiaketa honen bidez bi helburu lortu nahi dituzte. Alde batetik, euskara ikasten edo praktikatzen ari direnak bertsolaritzara hurbiltzea eta, bestetik, bertsolaritzak euskara praktikatzeko eskaintzen dituen aukerak erakustea.

 Helburu hauek betetzeko Bideokopla Txapelketa antolatu dute. Bi lagunetik gorako taldeek hartuko dute parte, eta honako gai honen inguruan osatu beharko dituzte koplak: "Euskaraz bizi nahi dut, dugu, duzu, zaitut...". Partehartzaileek gutxienez 6 eta gehienez 12 koplatako sortak osatu beharko dituzte eta bideoz grabatu. Ondoren, grabazioak praktikatuaek@gmail.com helbidera bidali beharko dira MARTXOAREN 25a baino lehen.

 Lehiaketa helduen euskalduntzeko zein mintzapraktika egitasmoetako edozein erakundetan dabiltzan taldeei zuzenduta dago. Hala ere, nahi izanez gero talde bakoitzak bertsolari baten laguntza eskatzeko aukera izango luke. Horretarako, parte hartu nahi duten mintzalagunek inguruko bertso-eskolari parte hartzeko aukera ematea izan daiteke lehenengo pausua, elkarlan hori lehenetsi egingo baita lehiaketan.

 Epaimahaia Bertsozale Elkarteak osatuko du. Hala ere, bideo guztiak "Praktikatu AEK" facebookeko orrian jarriko dira eta bertan bozkatzeko aukera emango dute. Talde irabazleak bertso-bazkari batez gozatzeko aukera izango du, bi bertsolarirekin.

 Nahi izanez gero hemen klik eginez ikus daiteke iazko sorta irabazlea. Eta informazio gehiago nahi izanez gero egin klik hemen.

• 
•