300 liburutik gora argitaratuta 2009-01-04

Aita Zabala hil da, Auspoaren sortzailea

Antonio Zabala herenegun hil zen Iruñean. Aita Zabala bertsolaritzak azken 50 urteetan izan duen biltzaile eta argitaratzailerik emankorrena izan da, eta  bere obra Gipuzkoako Foru Aldundiaren eskuetan utzi zuen.
1928ko urtarrilaren 23an jaio zen, Tolosan (Gipuzkoa). 17 urterekin Jesusen Lagundian sartu zen, eta ordena horretako kide da. Filosofia eta Teologia ikasketak egin zituen. 1964an, Euskaltzain oso izendatu zuten, eta 1999an, Honoris Causa doktore egin zuen Deustuko Unibertsitateak.
Herri literaturarako zuen zaletasunak bultzatuta, bertsopaperak biltzen hasi zen, 50eko hamarkadatik aurrera, eta zeregin horretan eman du bizitza guztia.
1961ean, Auspoa liburutegia sortu zuen. 40 urte luzeko bidean, 300 liburutik gora argitaratu ditu Antonio Zabalak liburutegi horretan: bertsolarien biografia, pasadizo eta bertsoak; herriko jendearen kontakizunak; garai bateko bizimoduaren berri ematen duten liburuak; erromantzeak; narrazioak... Euskal herri literaturaren gordailurik oparoena da gaur egun Auspoa liburutegia, eta bertsolaritzaren ikuspegitik ez ezik, antropologiaren, historiaren, soziologiaren eta literaturaren ikuspegitik ere berebiziko garrantzia du. Biltzaile, ikertzaile eta eragile izan da Zabala. Izan ere, biltzen eta ikertzen ez ezik, lan handia egin du zer kontatua zeukan jendea bilatzen eta horiek idaztera bultzatzen.

Iazko urterrilean bere lagunarteak eta erakundeek omenaldi xume bat egin zioten Amasa 80. urteurrenean. Ordukoak dira bertsook.