Umorez, Bigarren jardunaldia 2012-02-28

Mikel Otxotorena: "Erroa ez da aldatzen, egokitu egiten da egoera bakoitzera"

 Joan zen ostegunean bukatu ziren Euskal Herriko Bertsozale Elkarteko Genero Taldeak antolatutako Umorez jardunaldiak. Bi hitzaldi izan ziren azkeneko jardunaldian. Lehendabizikoan Mikel Otxotorena aritu zen, On:giz elkarteko kidea. Elkarte honetan berdintasunaren aldeko lana egiten dute, baina fokoa gizonengan jarriz. "Maskulinitate klasikoaren eraikuntza publizitate eta zinemaren bidez" izeneko hitzaldia eskaini zuen Villabonan. Bertan, generoari lotutako gaiak ikus-entzunezkoetan nola agertzen diren aztertu zuen. Azaldu zuenez rolak eta estereotipoak indartzeko garrantzitsuak dira ikus-entzunezkoak.

 Hitzaldian zehar gizonezkoak pantailan nola islatzen diren azaldu zuen gehienbat. Baina, zer da gizon izatea? Mikel Otxotorenaren iritziz aldatzen doan zerbait da kulturala den neurrian. Hala ere, hiru ezezkotan oinarrituko luke gizonezkoen izaera: ez emakume, ez homosexual eta ez ume. Hitzaldiaren lehendabiziko zatian aspaldiko iragarki eta filmak gaurkotasun handiagokoekin alderatu zituen. Itxura aldatu baldin bada ere, erroan dagoenak berdin jarraitzen du bere iritziz. Hala ere, itxaropentsu hitz egin zuen. Generoari lotutako aldaketak sozialak diren neurrian sustraitu daitezen denbora beharko dutela azaldu zuen, kontzientziazio lana egiten jarraitu beharko dela azpimarratuz.

• 
•