I.M. Barriola gelategian izango da saioa 2012-04-18

Bertsolariak eta robotak gaur Donostian

 Bertso-saio berezia egingo dute gaur Donostiako EHUko Gipuzkoako campusean, I.M. Barriola gelategian. Hitzarengunea-ren inaugurazioaren barruan, bertsolari eta roboten arteko saio bat egingo dute eguerdiko 12etatik 14etara. Andoni Egaña, Maialen Velarde, Oier Lakuntza eta Felix Zubia bertsolarien ondoan ariko dira "Galtxagorri" eta "Tartalo" robotak.

 Robotak hiru talderen artean garatu dituzte. Batetik, Robotika eta Sistema Autonomoen taldeak egin ditu robotika-lanak; beraiek eman diote gorputza makinari. Bigarren taldea Aholab ikerkuntza taldea da, ahotsaren sorkuntzan lan egin duena. Beraiek jarri dute robota kantari. Hirugarren taldea IXA ikerkuntza taldea da. Hauek eman diote robotari hutsetik bertsoak sortzeko gaitasuna. Horretarako, eskuragarri zegoen bertso multzo handi bat hartu da abiapuntu moduan. Hiru talde hauen laguntzarekin Manex Agirrezabal izan da proiektuaren garatzaile nagusia. Dena den, robotez gain bertsoarekin lotutako bestelako lan bat baino gehiagorekin ari dira une honetan, eta horiek aurkezteko ere balioko du gaurko saioak.

 Bertso-saioaren ondoren musikariak ere ariko dira, eta sagardoa eta txistorra ere banatuko dituzte. Nahi izanez gero saioa zuzenean jarrai daiteke hemen.

• 
•