Alaia Martin izango da aste honetako gonbidatua 2012-05-04

Belfast, Iruñea eta Urretxuko saioak Hitzetik Hortzeran

 Larunbat honetan Hitzetik Hortzera programa ikusi ahal izango da ETB1ean, eguerdiko Gaur Egun albistegiaren ondoren. Aste honetako programak hiru saio izango ditu ardatz. Alde batetik, Belfasten aurten bosgarrenez egin den Bertso Dinnerra eskainiko du programak. Jon Maia eta Alaia Martin joan ziren kantura, eta Irlandan bizi diren euskaldunak eta Euskal Herritik joandakoak izan zituzten lagun Culturlann etxean. Hango saioaz eta beste hainbat konturen inguruan aritzeko Alaia Martin egongo da platoan aste honetan Jon Artanoren galderei erantzunez.

 Bestetik, Iruñeako Hizkuntza Eskolan egindako saioko irudiak ere emango ditu Hitzetik Hortzerak. Unai Iturriaga, Maialen Lujanbio, Oskar Estanga eta Xabier Paya aritu ziren kantuan, Ainhoa Aranbururen gai bihurriei erantzunez. Urteroko festa ospatu zuten horrela.

 Hirugarren saioaren aurrerapena joan zen astean eskaini zuten. Urretxuko Motz tabernan bertso-bazkaria egin zuten Beñat Lizasok eta Iñaki Apalategik, eta hango bertsoaldi gehiago eskainiko ditu aste honetako programak.

 Bestalde, Bartzelonan egingo den "Bertso Sopar"-era joateko bidaiaren zozketa ere aste honetan egingo dute.

 Ohiko atalak ere izango ditu aste honetako programak. Hala, Zuri-Beltzekoan 1968ko otsailean Lasartek pinuari buruz kantatutako bertsoak berreskuratuko dituzte. Zappingean, berriz, Anjel Mari Peñagarikanok eta Gregorio Larrañaga "Mañukorta"-k galde-erantzunetan Azpeitian 1992ko abenduan egindako saioa izango da gozagai.

• 
•