Aste honetan Unai Muñoa eta Ane Labaka egongo dira platoan 2012-05-17

Ostiral iluntzean izango da Hitzetik Hortzera, 21etan

 Ordutegi berriarekin dator Hitzetik Hortzera bere denboraldiko azkenaurreko programara. Aste honetan ostiral iluntzean izango da ikusgai, 21etan. Hiru bertso-saio izango dira aste honetako programaren ardatz. Alde batetik, Lasarteko Manuel Lekuona Kultur Etxean urtero antolatzen duten saio bereziko irudiak emango dituzte. Herriko kultur taldeek parte hartzen dute emanaldian eta dantza, antzerkia eta musika bertsoarekin uztartzen dira. Aurtengoan Maialen Lujanbio eta Andoni Egaña aritu dira kantuan bertso-eskolako kideekin batera. Saio hari buruzko informazio gehiago emateko Unai Muñoa eta Ane Labaka egongo dira platoan. Saioan zehar Massiel-en "la, la, la" kantuaren doinuan aritu behar izan zuten bertsolariek, eta horri lotuta egongo da Zappinga. Izan ere, 1986ko Txapelketa Nagusian bertsolari batek doinu horretan kantatu zuten, eta biharko programan argituko dute misterioa.

 Bigarren saioa Urdazubiko Gauiñara elkartean egindakoa izango da. Maialen Lujanbiok eta Uxue Alberdik giro ederra jarri zuten.

 Azkenik, Bidalitakoak atalean Iker Zubeldiak eta Julio Sotok Arroa Behean egindako saioko irudiak ere eskainiko ditu programak.

 Ohiko atalei dagokienez, Zuri Beltzeko Auspoa atalean Mari Trekuk idatzitako "Mattin, nere gizona" liburua izango dute mintzagai. Luixa Guilzu ariko da liburuaz, eta pasarte bat ere irakurriko du.

 Bestalde, Ibai Esoainek sortutako Bertsolharitza emanaldi bereziaren inguruko erreportaje bat emango dute programan.

 Aste honetakoa denboraldi honetako azkenaurreko programa izango da. Datorren astean programa berezia egingo dute Bartzelonan grabatua, Agin Rezola eta Igor Elortzak egindako bertso-soparra ardatz duena.

• 
•