Imanol Lazkanori elkarrizketa Deian 2012-08-08

"Hizkuntza behartu gabe adieraztea bilatu dut beti"

 Joan zen urtarrilean Bertso Egunean adierazi zuen Imanol Lazkanok aurten plazako ibilbidea utziko duela. 14 urterekin lehenengo saioa egin zuenetik 60 urte baino gehiago joan dira. Deia egunkarirako elkarrizketa egin zion Dabi Piedrak orain dela egun batzuk, eta bere ibilbidearen errepasoa egin zuen bertan Imanol Lazkanok. 60 urteren ondoren plazetan egindako lagunekin mozteak "pena izugarria" emango badio ere bereari eusten dio: "traba egin baino lehenago norberak uztea hobeto da".

 Bertsolari bezala bere buruarekin "nahiko exijentea" izan dela dio: "hizkuntza behartu gabe adieraztea bilatu dut beti".

 Bertsozale Elkarteko lehendakari eta kide izan da urte askoan, eta harro dago egindako ibilbidearekin: "niretzat hori barru-barrutik ezagutzea ederra izan da, neu janzteko eta elkartea hazten ikusteko. Erakundeekin beti ez gara ondo moldatu, goitik beherako antolakuntza nahi izaten dute haiek kultur mailan eta nik beti esaten dut, goitik behera eta ondo, euria baino ez".

 Bertsolaritza osasuntsu ikusten du gaur egun, eta garbi dauka bertsoaren munduak batuta segiko duela: "elkar behar izate horrek eragin du bertsolariok elkarrekin ondo moldatzea. Bakarrik ez gara inorako gai".

 Elkarrizketa osorik irakurtzeko egin klik hemen.

• 
•