Saio goxoa 2012-11-28

Donostiako Lugaritz aretoan

Pasa den ostiralean izan zen bertso-saioa Donostiako Lugaritz aretoan. Urteroko hitzordua bihurtu da Donostia Kulturak antolatzen duen hau. Aretoa bete egin ohi da eta aurtengoa ez da salbuespen izan.

Amets Arzallus, Alaia Martin, Beñat Gaztelumendi eta Julio Soto igo ziren oholtzara Saroi Jauregi gai-jartzailearekin batera.

Amets Arzallus eta Alaia Martin Donostiako Londres hotelera bidali zituen euren ezkontza osteko bazkarira. Urte bete euren ezkontza prestatzen aritu ondoren, euren senideak izugarrizko liskarra eragin dute bazkalostean. Batzuentzat dramatik asko izan dezake gai honek baina Amets eta Alaiak umoretik hartu zuten.

Jarraian Beñat Gaztelumendi eta Julio Sotok bertsoaldi polita osatu zuten sare sozialen bueltan. Euskadi Irratiak 30 urte bete dituen honetan, Beñat Gaztelumendi irratizalea eta Julio Soto sare sozialen erabiltzailea parez pare jarri zituen Saroi Jauregik.

Gaurkotasunari eutsiz, Beñat Gaztelumendi eta Alaia Martin justiziaren prezioaz aritu ziren bertsotan; tramite judizial batzuk kobratzeko asmoaren harira.

Umorera salto eginez, Amets Arzallus eta Julio Sotok ilunpean afaldu zuten; eta saioaren amaieran, Beñat Gaztelumendi Xabier Euzkitzeren lekuan jarri zuen Saroi Jauregik Amets Arzallus elkarrizketatuz.

Saioarekin gozatu ederra hartu zuten Lugaritz aretoan elkartu ziren 200 lagun inguruk.