Bihar hasiko da Zumarraga-Urretxuko txapelketa 2009-02-26

"Plazarako saltoa eman gabeko bertsozale asko daude"

 Bihar hasiko da Zumarraga-Urretxuko bertsolari txapelketa. Honako hauek izango dira kanporaketak:

  Otsailaren 27a, ostirala, gaueko 23tan FOX tabernan. Saioaren aurretik "James John Ez doktorearen aurka" laburmetraia proiektatuko da.
  Martxoaren 6a, ostirala, gaueko 23tan Legazpiko Arranon.
  Martxoaren 7an, larunbata, arratsaldeko 19tan Ezkio-Itsasoko Igartubeiti baserrian.
  Martxoaren 13an, ostirala, gaueko 23tan Motz tabernan.
  Martxoaren 14an, larunbata, gaueko 23tan Aldiri tabernan.
  FINALA Martxoaren 27an, ostirala, gaueko 23tan Gaztelekun.

 Gorka Azkaratek azaldu duenez, "inguruan bertsozale asko daude, bertsotan aritu arren plazarako saltorik eman ez dutenak. Herriko txapelketak horiei kantatzeko aukera eskaini nahi lieke. Horrela, inguruan bertsolaritza sustatu nahiko genuke".

 Txapelketak bilakaera bat izan du hasierako urteetatik hona. "Hasieran Zumarraga-Urretxuko taldeak ateratzen ziren. Geroxeago Legazpitik ere etortzen hasi ziren. Eta aurten, lehenengo aldiz, Ezkio-Itsaso eta Gabiriako taldeak ere izango ditugu. Azkenean, herriko txapelketa bezala hasi zena eskualde osora zabaldu da". Aurten hiru bertsolariko hamasei talde ariko dira, guztira berrogeita zortzi bertsolari.
 
 Bertsolariek egin beharreko lanak "ohikoak" izango direla dio Gorkak. "Gure helburua ahalik eta jende gehienak parte hartzea da, eta horregatik, ez ditugu bakarka hiru bertso kantatzen jarriko, esaterako. Gainera, bertsolariak taldeka aritzen direnez, beti egoten da ariketak banatzeko aukera. Horrela, ariketa zailenak bertsotan gehien aritutakoek betetzen dituzte."

 Aurreko txapelketetan "parte hartzaile asko izan dira, eta tabernak ere bete dira". Aurtengoari esperantza horrekin ekingo dio Gorka Azkaratek.

 Informazio gehiago lortzeko egin klik hemen.

• 
•