Bertso-jaialdia Orion 2012-12-10

Plaza bikaina

Plaza bikaina da Oriokoa, ia 500 lagun elkartu ziren Karela kiroldegian. Urteroko zita bihurtu da Errikotxia bertso-eskolak antolatzen duen hau, bai oriotarrentzat baita inguruko herrietako lagunentzat ere.

Kiroldegiko pistaren erdian jarri zuten oholtza eta pareko aulki guztiak bete ziren. Unai Manterolarekin batera igo ziren oholtzara Maialen Lujanbio, Sustrai Colina, Andoni Egaña, Arkaitz Estiballes eta Iñaki Gurrutxaga. Azken honi nahikoa jo zioten adarra oriotarra izan eta Aiako Xantio auzoan bizi delako.

Umorea izan zen nagusi bertso-saioan bizpahiru bertsoaldi kenduta. Egun berean Benito Lertxundi oriotarrak Argizaiola saria jaso zuela eta, kantariak euskal kulturgintzari emandakoaz abesteko eskatu zien Unai Manterolak Andoni Egaña eta Maialen Lujanbiori. Jarraian, azken urteetan haurren jolasteko moduen aldaketei buruz aritu ziren bertsotan Lujanbio eta Iñaki Gurrutxaga.

Umoreari helduz, Arkaitz Estiballes, Andoni Egaña eta Iñaki Gurrutxaga jarri zituen kantuan gai-jartzaileak; bertsolari izatea eta aitatasuna nola uztartzen duten galdetu zien hirurei. Telebistan ez dakigu zein arrakasta izango duen baina bertso-saioetan askotan hartzen dute gaitzat Xabier Euzkitzeren Bisitaria saioa. Oraingo honetan, Arkaitz Estiballesek abestu du Euzkitzeren ahotik, Maialen Lujanbiori, Euskal Herriko txapeldunari bisita eginez.

Eta bukatzeko, egia omen den egoeran jarri zituen Unai Manterolak Maialen Lujanbio eta Sustrai Colina. Orioko inmobiliaria batek honako eskaintza egin omen du: etxea erosteko %30eko deskontua, etxe osoa altzariz hornituta eta bikotea bilatzeko interteneko orrialde horietako batean urte beteko harpidetza. Lujanbio eta Colinak, interneteko zerbitzu horren bidez ezagutu dute elkar.