Zarauzko Kopla Txapelketa 2012-12-17

Unai Iturriagak jantzi du zintzarria

 Joan zen ostiralean jokatu zen Zarauzko Kopla Txapelketaren seigarren edizioa Putzuzulo Gaztetxean. Urtero bezala, goraino bete zen gaztetxea saioa jarraitzeko, eta giro bero-beroa izan zuten bertsolariek parean. Honako bertsolari hauek kantatu dute aurtengo edizioan:

 Beñat Gaztelumendi
 Nahikari Gabilondo
 Alazne Untxalo
 Jon Maia
 Beñat Ugartetxea
 Patxi Iriart
 Aitor Sarriegi
 Oihane Perea
 Unai Iturriaga
 Maddi Ane Txoperena
 
 Lehendabizko fasean hiru ariketa burutu zituzten bertsolariek, denak ere koplatan: librean binaka, gaia emanda binaka eta gaia eta doinua emanda, musikarien laguntzaz, binaka. Saio oso umoretsua osatu zuten lehenengo fase honetan. Ondoren, bigarren fasera honako bertsolari hauek sailkatu ziren: Jon Maia, Unai Iturriaga, Aitor Sarriegi, Beñat Gaztelumendi, Nahikari Gabilondo eta Oihane Perea. Hemen bi ariketa osatu zituzten bertsolariek: librean binaka eta gaia emanda binaka. Behin ariketa hauek osatuta jakin zen ze bertsolarik jokatuko zuten buruz burukoa: Jon Maiak eta Unai Iturriagak. Librean aritu ondoren, hiru minutuz bakarka objektu banari kantatu zieten. Zapata gorri batzuk egokitu zitzaizkion Unai Iturriagari eta gutun bat Jon Maiari. Azkenik, gaia emanda aritu ziren, binaka. Buruz burukoa ederra atera zen.

 Azkenean Unai Iturriagak jantzi zuen zintzarria eta berak hartu zuen Maddalen Arzallus, Igor Elortza, Julio Soto, Amets Arzallus eta Beñat Gaztelumendiren lekukoa.

• 
•