Atzo egin zen hileta elizkizuna Azpeitiko parrokian 2012-12-18

Azken agurra Joxe Agirreri

Bertso munduko ordezkaritza zabala izan zen bertan. Besteak beste, elizkizunaren bukaera aldera Sebastian Lizaso, Maialen Lujanbio, Andoni Egaña, Xabier Euzkitze eta Amets Arzallusek bertso bana bota zioten. Behin elizkizuna bukatuta agurra dantzatu zion dantzari batek eta "Agur jaunak" kantatu zioten bertaratu zirenek.

Atzo egin zen Joxe Agirreren aldeko hileta elizkizuna Azpeitiko parrokian. Bertso munduko ordezkaritza zabala bertaratu zen hara, eta leporaino bete zen eliza. Elizkizunaren bukaera aldera Sebastian Lizasok, Andoni Egañak, Xabier Euskitzek eta Amets Arzallusek bota zioten bertso bana Joxe Agirreri . Hilkutxa eramaten ere bertsolariak aritu ziren: Imanol Lazkano, Iñaki Murua, Jon Maia, Jokin Uranga, Mikel Mendizabal, Jose Juan Eizmendi "Loidisaletxe II", Igor Elortza, Jexux Mari Irazu, Aitor Mendiluze eta Sustrai Colina. Horrez gain, Azpeitiko herritarrek zein kanpotik inguratutakoek bere maitasuna adierazi zioten "Agur jaunak" kantatuz. Hiletaren inguruko informazio zabala dakar Uztarriak (argazkia ere handik hartua da).

Joan zen larunbat goizean hil zen Joxe Agirre "Oranda" bertsolaria bere etxean. Aspaldian osasun aldetik makalago bazebilen ere, abenduaren 6an lagunarteko bertso-saio bat egina zuen Oñatin. 83 urterekin joan da bertsolari eta bertsozaleek hainbeste maite duten bertsolaria.

60 urtetik gorako ibilbidea

1929ko apirilaren 13an jaio zen Azpeitiko Oranda-Behekoa baserrian, eta bertan eman du bere bizitza osoa. Bertsotarako pausua eman aurretik herrian bertan zaletu zen, aitonak jarritako puntuei erantzuten hasieran eta Korral eta Etxe-Zuri tabernetan ondoren, 1952an egin zuen lehendabiziko plaza, baina mugarria 1959an izan zuen, Aginagako txapelketa irabazi zuenean. Ordutik hona plazaz plaza aritu da ia bukaerara arte, eta Joxe Lizaso eta Imanol Lazkanorekin batera hirukote ospetsua osatu zuen bere ibilbidean. Hain zuzen ere, hirurek herriaren omenaldia jasoko dute abenduaren 23an.

Txapelketak maite ez bazituen ere, bere garaiko erreferente nagusienetako bat da gaur egun. "Eskolatu gabeko bertsolarien arrazaren azkeneko erakusgarri" moduan hartu izan da. Uztapideren jarraitzaile izanik, gaur egungo moldeetara ere egokitzen asmatu zuen azpeitiarrak, eta bertsolari gazteekin harreman berezia zeukan, Jokin Urangak Berrian idatzitako artikuluan azaltzen duen moduan.

Puntuak josteko trebezia aparta zeukan Joxe Agirrek, eta ziri-zorrotza beti. 2004an Uztarriak elkarrizketa egin zion.