Bertsolaritzaren irakaskuntza proiektua laguntzeko 2012-12-26

Neguko abestiak Nafarroako Bertsozale Elkartearen alde

 Haurrentzako euskarazko abestiak sortzen dituen taldea da Ene Kantak. Nerea Urbizu eta Urko Oskoz irakasleek osatzen dute taldea. Bigarren diskoa kaleratu berri du "Neguari abesten" izenekoa. Bertan, neguko abestien bilduma bat osatu dute, berriki sortutakoak eta lehenagotik zeudenak bilduta. Taldearen filosofiari jarraiki, diskoaren irabaziak Nafarroako Bertsozale Elkarteari bideratuko zaizkio, honek D ereduko eskola eta ikastoletan bertsolaritzaren inguruan lanean jarraitu ahal izan dezan. Iaz Nafarroako Gobernuko Hezkuntza Departamenduarekin zenbait gora-behera izan ondoren, "Bertsolaritza Irakaskuntza" proiektuak murrizketa nabarmenak jasan ditu aurten.

 Diskoa Pelusok koordinatu du eta hainbat kolaborazio jaso dituzte: Igor Elortza, Uxue Alberdi, Xabi Terreros eta Estitxu Fernandez bertsolariena; Urko Aristi kazetariarena; Leihotikan taldeko Gorka abeslariarena eta Zubieta eta Olazabal pilotariena kasu. Gainera, Kukuxumusuk marrazkiak egin ditu diskoaren aurkezpenari osotasuna emate aldera.

 Diskoa Nafarroako Bertsozale Elkartearen egoitzan eskura daiteke, telefonoz eskaria eginez honako zenbaki honetara deituta: 948 143747.

• 
•