Azpeitiarra elkarrizketatuko du Jon Artanok 2012-12-27

Imanol Lazkanoren azken plaza Hitzetik Hortzeran

 Joan zen abenduaren 23an egin zuen Imanol Lazkanok bere azkeneko plaza, Azpeitian. Urte hasieran, Bertso Egunean, iragarri zuen 60 urteren ondoren plazaz plazako jardun oparoa etetea erabaki zuela. Aste honetan berari eskainiko diote Hitzetik Hortzera programa. Plaza uztera eraman duten arrazoien eta oraingo sentipenen berri emango dio Jon Artanori bere sendiaren etxean, Gaztelun, egindako elkarrizketan. Santo Tomas egunez eginikoa da elkarrizketa, eta egun horretan urtero Azpeitian egiten den saiora ere joango dira biak. Bertan kantatu behar duten bertsolariekin ere ariko dira hizketan: Amaia Agirre, Millan Telleria, Beñat Lizaso eta Iñaki Muruarekin hain zuzen ere. Gai-jartzaile lanetan Sebastian Lizaso aritu zen egun horretan, eta alerik onenak eskainiko dituzte programan.

 Bestalde, abenduaren 23an Azpeitian egindako omenaldiko unerik onenak ere eskainiko ditu programak. Aipatu bezala, bertan egin zuen azkeneko plaza Imanol Lazkanok. Omenaldia ez zen beretzat soilik izan ordea, urte luze hauetan bertsolaritzaren alde egindako lana eskertu nahi izan zieten Jose Luis Gorrotxategi, Laxaro Azkune, Joxe Lizaso eta Joxe Agirreri ere. Bertsotan Andoni Egaña, Amets Arzallus, Maialen Lujanbio, Aitor Mendiluze, Uxue Alberdi eta Sebastian Lizaso jardun ziren Laxaro Azkune gidari zutela.

 Programa ostiralean iluntzeko 21etan eta igandean arratsaldeko 15etan izango da ikusgai ETB1en.

• 
•