Nafarroako Txapelketa 2009-03-05

Julio Soto: "lasai nago"

 Antsoaingo saioaren ondoren jakingo da zein zortzi bertsolari ariko diren Nafarroako txapelketako finalean. Iñigo Olaetxea eta Xabier Silveira dira, oraingoz, postua ziurtatua dutenak. Beraiekin batera kantatu nahiko luke Julio Sotok finalean. Iaz, hogei urterekin, hirugarren egin zuen finalean. "Iaz ez neukan presiorik, ez neukan ezer galtzeko. Orain dela bi urte ez nintzen finalera sartu, eta lehengo urtean nahikoa nuen finalean aritzearekin. Aurten badirudi goian gelditzen ez banaiz dezepzio bat izan daitekeela, jendeak asko espero baitu nigandik. Baina, ni lasai nago". Igantziko saioan "oso gustura" aritu zen kantuan, "zortziko handiko saioa kenduta". Zerbait aukeratu beharko balu, bakarka botatako bertsoekin geldituko litzateke: "gaia entzun eta berehala etorri zitzaidan ideia". Bertso eskolan ere "ondo" omen dabil azken aldian. "Aste honetan nabaritzen dut larunbatean saioa dudala, eta bertso eskolan ez nabil normalean bezala. Lasai nago, hala ere, eta Antsoainen ere hala egongo naizela uste dut".

 Jada beste bi finalaurreko jokatuta, faborito bat dauka: "Silveira. Altsasun oso ondo ibili zen. Dena den, Julen da egungo txapelduna, eta hor egongo da".

 Finaleko azken txartela izango da jokoan, beraz, larunbat honetan. Honako bertsolari hauek lehiatuko dira txartel hori lortzeko:

 Julio Soto
 Erika Lagoma
 Xabier Legarreta "Arano"
 Jose Juan Zubieta Portu "Etxabe"
 Ander Fuentes "Itturri"
 Iñaki Aleman

 Saioa arratsaldeko 17:30etan hasiko da Antsoaingo Antzokian. 

• 
•