Gaur izan da aurkezpena 2013-06-11

Bertsolaritza ikertzeko kontratu deialdia zabalik

 Mikel Laboa Katedrak, EHUko Euskara Errektoreordetzak eta Mintzolak bertsolaritza ikertzeko kontratu deialdia zabaldu dute. Gaur egin dute aurkezpena Villabonako Subijana Etxean. Bertan izan dira Iñaki Murua Bertsozale Elkartetik, Jesus Mari Makazaga EHUko Euskara eta Ikerkuntza Errektoreordetzatik, Juan Kruz Igerabide Mikel Laboa Katedratik eta Zigor Etxeburua Gipuzkoako Foru Aldunditik. Iñaki Muruak azaldu duenez, "lehenengo aldia da bertsolaritzari buruzko doktorego tesia emateko gai garena". Bertsozale Elkartearen Ikerkuntza Planean ageri diren ikergaietan oinarritu beharko du tesia egiten duen ikerlariak. Ikerketa Ekintza Parte-Hartzailearen bidez eta urtebeteko prozesu baten ondoren osatu zen Ikerkuntza Plana, eta bertsolaritzaren inguruan dabiltzan 100 eragile eta aditu baino gehiagok hartu zuten parte prozesuan. Aurtengo deialdirako lau iker-lerro proposatu dituzte:

-Bertsozaletzeko arrazoiak eta mekanismoak ikertu adin ezberdinetan eta tokian tokiko ezaugarri soziolinguistikoak kontuan hartuz
-Herrialdeko BEren eskutik hezkuntza arautuan, bertso-eskoletan eta aisialdian egiten den lanaren metodologiaren eta emaitzen azterketa
-Bertsolaritzaren transmisio modu guztien azterketa: formala, ez-formala eta informala
-Bertsolaritzaren transmisioak hezkuntzako zein gizarteko esparru ugaritan egin dezakeen onura eta ekarpena aztertzea

Eskariak aurkezteko epea 2013ko uztailaren 10ean amaituko da. Deialdiaz informazio osoagoa www.Mintzola.com-en aurki daiteke.

• 
•