Basarriren mendeurrenean 2013-09-04

Egañak Basarriren bertsogintzaz jardungo du gaur Zarautzen

Andoni Egañak Inazio Eizmendi Basarri bertsolariaren bertsogintzaz hitzaldia emango du gaur arratsaldean Zarautzen, Basarriren mendeurrenaren harira egiten ari diren ekitaldien baitan. Hitzaldia 19:30etan izango da, Sortaldea kultur eremuan.

Hainbat ekitaldi urtean zehar
Iñaki Eizmendi Basarri bertsolariaren mendeurrenean hainbat ekitaldi antolatu eta burutu dituzte, apireltik azarora. Zarauzko Udala eta Motxian Bertso eskolaren ekimena da, eta hainbat erakunderen  lankidetza izan du: Bertsozale Elkartea, Foru Aldundia, Euskaltzaindia, Eusko Ikaskuntza eta Zarautz Abesbatza.
 
Ekitaldiak
Apirilean hasi ziren ospakizunak eta azaroa bitartean burutuko da egitaraua. Besteak beste, hitzaldiak eta bertso saioak egingo dira. Apirilean, Pello Esnalek eta Nikolas Zendoiak hitzaldi bana eman zuten: Basarriren kontalaritza lana eta Basarriren kazetaritza lana. Uztailean, Basarriren omenezko kontzertua eskaini zuen Zarauzko Abesbatzak. Abuztuan, Azken Portu auzoko jaietan, plaka jarri zioten Basarri bizi izan zen Azken Portu etxean. Eta gaur, Basarri eta bertsogintza hitzaldia emango du Andoni Egañak. Udazkenean, ekitaldi sortari amaiera emateko Basarriri buruzko erakusketa ere jarriko dute.

Basarri: bertsolari, idazle eta kazetari
Iñaki Eizmendi Manterola, Basarri, Errezilgo Granada baserrian jaio zen, 1913ko azaroaren 27an; baina zazpi urte zituenez gero Zarautzen bizi izan zen, familia osoa herri honetara bildu zen-eta bizitzera, Azken Portu tabernan. Hil ere Zarautzen hil zen, 1999ko azaroaren 3an, laurogeitasei urte betetzear zegoela. Bertso jarrietan ere lan handia egin zuen Basarrik.
 Aldizkarietan argitaratutako bertsoekin hiru bertso-bilduma kaleratu zituen: Basarri'ren bertso-sorta (1950), Kantari nator (1960) eta Laugarren Txinpartak (1966). Bestalde, bertsoz moldaturiko Atano III, bere bizitza bertsotan biografia ere egin zuen (1949).

 

• 
•