Bertsolari Txapelketa Nagusia 2013-09-17

Muina bertsogintzan izango duen Txapelketa

 Lau urtetik behin bertsolaritzaren mugimenduari eragiten dio Txapelketa Nagusiak. Udazkenean abiatuko da 2013ko edizioa. Muina bertsogintzan jarrita, 43 bertsolari, 14 gai-jartzaile, 16 epaile eta dozenaka bertsozalek hartuko dute aurtengo edizioan parte. Aurten, lau aldiz txapela jantzitako Andoni Egañak ez du parte hartuko. Dena den, orain dela lau urte finalean aritu ziren gainerako zazpi bertsolariak bertan izango dira.

36 bertsolari kanporaketetan

36 bertsolarik ekingo diote Txapelketa Nagusiari kanporaketetan. Denera sei bertsolariz osatutako sei saio jokatuko dira:

 IRAILAREN 29an, IGANDEZ
 Villabonako Behar-Zana pilotalekuan, 17:30etan
  Iker Zubeldia
  Odei Barroso
  Alaia MArtin
  Fredi Paia
  Jon Martin
  Nerea Elustondo
 
 URRIAREN 5ean, IGANDEZ
 Markina-Xemeingo Udal pilotalekuan, 17:30etan
  Agin Laburu
  Arkaitz Estiballes
  Beñat Ugartetxea
  Eneko Fernandez
  Jone Uria
  Onintza Enbeita

 URRIAREN 12an, LARUNBATEZ
 Hendaiako Beltzenia ezker-paretan, 17:30etan
  Amaia Agirre
  Felix Zubia
  Iban Urdangarin
  Iñaki Apalategi
  Iñaki Zelaia
  Julio Soto

 URRIAREN 13an, IGANDEZ
 Altsasuko Burunda pilotalekuan, 17:30etan
  Beñat Gaztelumendi
  Erika Lagoma
  Jexux Mari Irazu
  Oihane Perea
  Unai Agirre
  Xabier Silveira

 URRIAREN 19an, LARUNBATEZ
 Legazpiko Urbeltz pilotalekuan, 17:30etan
  Ainhoa Agirreazaldegi
  Beñat Lizaso
  Igor Elortza
  Iñigo Mantzizidor "Mantxi"
  Jokin Uranga
  Oihana Bartra

 URRIAREN 26an, LARUNBATEZ
 Oiongo Arroyo I pilotalekuan, 17:30etan
  Eneritz Zabaleta
  Etxahun Lekue
  Iratxe Ibarra
  Maddi Sarasua
  Manex Agirre
  Miren Amuriza

 Kanporaketa bakoitzeko irabazlea zuzenean sailkatuko da finalaurrekoetara. Gainerakoek puntuazioen zain geratu beharko dute. Honako lan hauek egin beharko dituzte bertsolariek lehenengo fasean:

 -Binaka, gaia emanda, hiruna bertso zortziko handian
 -Binaka, gaia emanda, hiruna bertso zortziko txikian
 -Banaka, lehen puntua emanda, hiru bertso zortziko txikian
 -Binaka, gaia emanda, hamarreko txikian hiruna bertso
 -Kartzelako lana: banaka, gaia emanda, hiru bertso nahi den doinu eta neurrian

Bi itzuli eta zazpi saio finalaurrekoetan

 Finalaurreko fasean 24 bertsolari hasiko dira kantuan. Horietatik 18 sailkatuko dira finalaurrekoetako bigarren itzulira. Orain dela lau urte finalean aritu ziren bertsolariak fase honetan sartuko dira lehian Maialen Lujanbio izan ezik: txapeldun geratu zenez, zuzenean sailkatuta dago finalera. Honako lau saio hauek izango dira lehenengo itzulian:

 AZAROAREN 9an, LARUNBATEZ
 Gernika-Lumoko, Jai-Alai pilotalekuan
  Amets Arzallus
  Villabonako irabazlea
  Hendaiako irabazlea
  Puntuazioz 1.a
  Puntuazioz 8.a
  Puntuazioz 9.a

 AZAROAREN 10ean, IGANDEZ
 Tolosako Usabal kiroldegian
  Unai Iturriaga
  Legazpiko irabazlea
  Oiongo irabazlea
  Puntuazioz 2.a
  Puntuazioz 6.a
  Puntuazioz 11.a

 AZAROAREN 16an, LARUNBATEZ
 Oiartzunen, Elorsoro kiroldegian
  Aitor Sarriegi
  Jon Maia
  Markinako irabazlea
  Puntuazioz 3.a
  Puntuazioz 6.a
  Puntuazioz 11.a

 AZAROAREN 17an, IGANDEZ
 Murgiako Palatu kiroldegian
  Aitor Mendiluze
  Sustrai Colina
  Altsasuko irabazlea
  Puntuazioz 4.a
  Puntuazioz 5.a
  Puntuazioz 12.a

 Honako ariketa hauek egin beharko dituzte bertsolariek:

 -Binaka, gaia emanda, hiruna bertso zortziko handian
 -Binaka, gaia emanda, hiruna bertso zortziko txikian
 -Banaka, lehen puntua emanda, hiru bertso zortziko txikian
 -Binaka, gaia emanda, hiruna bertso sei puntuko motzean
 -Kartzelako lana: banaka, gaia emanda, hiru bertso nahi den doinu eta neurrian

 
 26 bertsolari horietatik 18 sailkatuko dira finalaurrekoetako bigarren itzulira. Hiru saio jokatuko dira fase honetan:

 AZAROAREN 23an, LARUNBATEZ
 Elizondoko Baztan pilotalekuan
  Gernikako irabazlea
  Puntuazioz 1.a
  Puntuazioz 4.a
  Puntuazioz 7.a
  Puntuazioz 10.a
  Puntuazioz 13.a

 AZAROAREN 24an, IGANDEZ
 Donostiako Atano III pilotalekuan
  Oiartzungo irabazlea
  Tolosako irabazlea
  Puntuazioz 5.a
  Puntuazioz 6.a
  Puntuazioz 11.a
  Puntuazioz 12.a

 AZAROAREN 30ean, LARUNBATEZ
 Maule-Lextarreko Ororena ezker paretan
  Murgiako irabazlea
  Puntuazioz 2.a
  Puntuazioz 3.a
  Puntuazioz 8.a
  Puntuazioz 9.a
  Puntuazioz 14.a

 Honako lan hauek egin beharko dituzte bertsolariek:

 -Binaka, gaia emanda, hiruna bertso hamarreko handian
 -Binaka, gaia emanda, hiruna bertso zortziko txikian
 -Binaka, gaia emanda, hiruna bertso hamarreko txikian
 -Binaka, gaia emanda, zortziko txikian puntutan, zortzi bertso osatu arte
 -Kartzelako lana: banaka, gaia emanda, hiru bertso nahi den doinu eta neurrian


 Abenduaren 15ean jokatuko da finala

 Finala abenduaren 15an jokatuko da Barakaldoko BEC aretoan. Maialen Lujanbio zuzenean sailkatuta dago. Gainerako zazpi finalistak puntuazioen arabera sailkatuko dira. Ohi bezala, goizez eta arratsaldez egingo da saioa. Goizean honako ariketa hauek egin beharko dituzte bertsolariek:

 -Binaka, gaia emanda, hiruna bertso zortziko handian
 -Binaka, gaia emanda, hiruna bertso zortziko txikian
 -Banaka, lehen puntua emanda, hiru bertso zortziko txikian
 -Binaka, gaia emanda, hiruna bertso sei puntuko motzean
 -Kartzelako lana: banaka, gaia emanda, hiru bertso nahi den doinu eta neurrian

 Arratsaldean bi fase izango dira. Lehendabizi, zortzi bertsolariek honako ariketa hauek egin beharko dituzte:

 -Binaka, gaia emanda, hiruna bertso hamarreko txikian
 -Binaka, gaia emanda, zortziko txikian puntutan, zortzi bertso osatu arte
 -Banaka, gaia emanda, hiru bertso nahi den doinu eta neurrian

 Behin ariketa hauek eginda, bi bertsolari sailkatuko dira buruz burukora. 10 bertso puntuagarri kantatu beharko ditu bakoitzak:

 -Binaka, gaia emanda, hiruna bertso sei puntuko motzean
 -Binaka, gaia emanda, hiruna bertso zortziko txikian
 -Kartzelako lana:
  -Banaka, hitza gaitzat emanda, bertso bat bederatziko txikian
  -Banaka, gaia emanda, hiru bertso nahi den doinu eta neurrian

 Txapelketa internetez eta Hitzetik Hortzeran jarraitu ahal izango da

 Aurten ere Bertsoa.com-ek apustua egingo du Txapelketa Nagusiko saio guztiak zuzenean eskaintzeko. Gainera, behin saioak bukatuta, bertsoaldi onenak ere ikusgai jarriko ditugu ahalik eta azkarren. Aurten, dena den, eduki bereziak ere izango dira, eta parte-hartzaileei egindako elkarrizketak eta kulturgintzako eta bertsogintzako adituen gogoetak eskainiko ditu astero Bertsoa.com-ek.

 www.bertsozale.com webgunean ere jarraitu ahal izango da Txapelketa Nagusia. Bertan parte-hartzaileei buruzko datuak, sailkapenak, albisteak, saioetako laburpenak eta beste hainbat eduki kontsultatu ahal izango dira. 2012an berritu zen webgunea eta Txapelketa Nagusiak azpiatal berezia izango du. Horrez gain, bertsolaritza ikertzen ari den ikerlari talde zabal batek Txapelketa Nagusira bideratutako gogoetak egingo ditu. Bakoitzak bere talaiatik, antropologoek, irakasleek, kazetariek eta musikariek Txapelketa Nagusian gertatzen dena aztertuko dute. 14 aditu hauek egindako ekarpenak ere www.bertsozale.com atarian egongo dira kontsultagarri.

 Sare sozialetan ere Txapelketa Nagusiaren jarraipena egingo da Facebook-en eta Twitterren. Azken honetan #btn13 traola erabiliko da.

 Hitzetik Hortzerak ere apustua egingo du aurten, eta bi programa eskainiko dira astero: igandeetan arratsaldeko 15etan eta astelehenetan 23:15etan. Horietan, asteburuko saioen jarraipen zabala egingo da. ETB eta Bertsozale Elkarteak elkarlanean gauzatzen dute Hitzetik Hortzera programa.


 Inprobisatzaileen bisita eta euskalduntzearekin elkarlana

 Txapelketa Nagusiaren bukaera aldera atzerriko inprobisatzaile eta adituek bisita egingo dute. Eta euskaltegietan lanean ari diren ikasleak erakartzeko asmoz, Txapelketako saioak jarraitzeko ikastaro didaktikoak eskainiko zaizkie. Bertsozale Elkarteak eta hainbat euskalduntze erakunde eta euskaltegiren artean martxan jarritako proiektua da honako hau.
 

 Sarrerak internetez eskuragarri

 Azken urteetan bezala, aurten ere sarrerak internetez erosi ahal izango dira www.bertsosarrerak.eu atarian. Saioetarako sarrerez gain, bonoak ere eskuragarri egongo dira. Bazkideek eta gazteek beherapenak izango dituzte. Finalaurrekoetarako sarrerak urriaren 14an jarriko dira salgai.

 Dena den, finalerako sarrerak eta autobus eta bazkaritarako txartelak salgai jarriko dira zenbait herritan. Salmenta puntuen zerrenda www.bertsozale.com atarian kontsultatu ahal izango da.

 Azkenik, ohi bezala, aurten ere sintonia izango du Txapelketak. Bixente Martinez, Amaiur Cojaraville eta Hasier Oleagak osatutako Igelaren Banda taldeak egin du aurtengo sintonia.

Bertsozale Elkartearen  zortzigarrena

 Aurtengoa hamaseigarren Bertsolari Txapelketa izango da. Lehendabiziko zortziak Euskaltzaindiak antolatu zituen. 1935ean Iñaki Eizmendi "Basarri" izan zen txapeldun; 1936an Manuel Lujanbio "Txirrita"; 1960an berriz ere Iñaki Eizmendi "Basarri"; 1962an, 1965ean eta 1967an Manuel Olaizola "Uztapide" nagusitu zen eta 1980an eta 1982an Xabier Amurizak jantzi zuen txapela. Ondoren, 1986an, Bertsozale Elkarteak heldu zion Txapelketa Nagusiaren antolaketari. Urte horretan Sebastian Lizaso izan zen txapeldun, 1989an Jon Lopategi eta 1993an, 1997an, 2001ean eta 2005ean Andoni Egaña. Urte horretan eman zuen finalak Donostiatik Barakaldorako jauzia. Orain dela lau urte Maialen Lujanbio izan zen txapeldun, buruz burukoa Amets Arzallusekin jokatuta.

• 
•