Bertso-jaialdia Orbaibairren 2013-09-23

Nafarroa eta euskara lotuz

Kilometroen arabera ez ditugu distantzia handiak Euskal Herrian baina euskarak errealitate oso ezberdinak bizi ditu eremu txikian. Aspaldi kendu zieten ahotik euskara orbaibartarrei eta orain berreskuratze-lanetan ari dira bailarako herritarrak.

Pasa den larunbaten, hilaren 14an, hamaseigarren aldiz antolatu zuten Orbaibar edo Baldorbako Jaia. Bailarako herritarrak elkartzeko asmoz, haurrentzako tailerrak, azoka, kontzertuak... egin zituzten eta lehenengo aldiz bertso-saioa.

Orbaibarko Oloriz herrian dagoen Etxano baselizan egin zuten bertso-saioa. Iñigo Ibarra, Jexux Mari Irazu, Odei Barroso eta Julio Soto aritu ziren kantuan. Aritza Iriartek egin zituen gai-jartzaile lanak.

Akustika berezia du baselizak eta bertsolariek aldarera eta gorantz begira abestu zuten euren hitzak ulertu ahal izateko; eta entzuleei bizkarra emanda. Ez da ohikoa hori, eta bertsolarien eta entzuleen arteko komunikazioan oztopo baldin bada ere,  hitzak eta doinuak hartu zuten indarra Orbaibarren.

Hiruzpalau bertsoaldi barruan egin ondoren,bertsolariak kanpora atera ziren entzuleei eta inguru ederrari begira kantatzera. 

• 
•