Bertsolari Txapelketa Nagusia 2013-09-27

Aurkezpena eta jaia

Iluntzeko zazpi t'erdietan zegoen hitzordua jarria Bertsozale Elkartearen egoitzan, Villabonan. Txapelketarako sintonia egin duen Igelaren Bandaren zuzeneko doinuak egin zien ongi-etorria gonbidatuei. Gonbidatuen artean txapelketan parte hartuko duten bertsolariak, gai-jartzaileak, epaileak, antolatzaileak, babesleak....

Gonbidatu gehienak aretoan elkartuta, Villabonako bertso-eskolako gaztetxoak igo ziren oholtzara. Ondo baino hobeto eman zioten hasiera ekitaldiari Beñat, Ekhi eta Endikak "Jantzi kaskua, lotu gerrikua hastera doa Euskal Herrikua " abestuz.

Maite Berriozabalek egin zituen aurkezle-lanak eta lehen hitzen ondoren, duela 200 urte inguru Villabonan egindako desafioaren berri eman zuen aurkezleak. Zabala Amezketarra eta Txabalategi Hernanikoaren artean jokatu zuten bertso-desafioa; hala kontatzen du Juan Inazio Iztuetak "Gipuzkoako dantza gogoangarrien kondaira edo historia" liburuan. Egungo txapelketan txapeldun bakarra izaten den moduan, orduan berdinketan geratu ziren bi bertsolariak; entzuleek hala eskatuta eta epaileen adostasunarekin. Desafio hura gogora ekarri zuten atzo; Miel Mari Jauregi "Altzo" eta Saroi Jauregi kontalari-lanetan eta Eñaut Agirre kantari.

Jarraian, Xebastian Lizaso eta Andoni Egaña igo ziren oholtzara bertso-kantura. Andoniren esanetan, beldurrez dardarka somatu zituzten txapelketako bertsolari parte-hartzaileak Xebastian eta biak bertsotan entzunda.

Igelaren Bandak txapelketaren sintonia jo ondoren, Iñaki Murua Bertsozale Elkarteko lehendakariak hartu zuen hitza.

Bukatzeko, Behar -zana pilotalekuan txapelketako parte-hartzaileen argazkia atera zuten: bertsolariak, gai-jartzaileak eta epaileak denak batera.

Hori aurkezpenari zegokiona, eta hortik aurrerako jaiari dagozkionak ezin askorik kontatu. Txapelketak berezkoa du tentsioa eta tentsio hori askatzeko balio izan bazuen, gaitzerdi!

• 
•