BTN13 2013-10-30

Arabako plazetan

Uda bukatu ostean ideia bat sartu zitzaidan buruan: Arabako bertsolaritzak eta En Tol Sarmiento taldeak hainbat antzekotasun ditugula lurraldea konpartitzeaz gain.

Alde batetik, bion ‘habitat naturala’ plazetan dago, hau da, gure barnean daramagun onena herriko plazetan eskaintzen dugu. Bestetik, entzulegoaren erantzunaren morroi gara, izan ere, beraien erantzuna ezinbestekoa dugu patxadaz aritzeko. Gainera, bion arteko konexio berezi bat sortu behar da emanaldiak nolabaiteko zentzua izateko. Azkenik, bai bertsolariek, bai E.T.S. taldekideok xede bakarra dugu, ondo pasatzea.

Oiongo bertso saioa atsegin gertatu zen. Giro epela, lasaia eta ohiko urduritasunez inguratuta. Halaber, emanaldi berezia izan zen. Ez frontoi barruan gertatu zenagatik, baizik eta Euskal Herriko inguru horretan ospatu izanagatik. Jendearen erantzunak argi utzi zuen bertsolaritzak eta euskal kulturak zentzua duela eta oraindik asko esateke duela Arabar Errioxan.

Ez naiz bertsotan aditua, onartu behar dut. Dena den, bertsoez gozatzen dudan bakoitzean, bertsolarien inprobisatzeko ahalmenak eta egoera guztietara moldatzeak betiere harrituko nau. Musikari guztiok ezin dugu gauza bera esan…

Iñigo Etxezarreta. Musikaria, En Tol Sarmiento taldeko abeslaria

• 
•