Bertsolari Txapelketa Nagusiari lotuta 2013-11-04

Euskaltegietako 1200 ikaslek bertsolaritza ezagutuko dute

 Bertsolari Txapelketa Nagusiak oihartzun handia du euskal komunitatean. Irail bukaeran hasi eta abendu erdialdera arte, interes handia pizten duen ekimena da. Euskaltegietan ikasten ari diren ikasleentzat amu ona delakoan, Bertsozale Elkarteak hainbat euskaltegirekin elkarlanean saio didaktikoak eskainiko ditu. Helburua ikasleek Bertsolari Txapelketa Nagusiko saio bat jarraitzeko beharrezko heldulekuak edukitzea da. Horrez gain, Bertsolari Txapelketa Nagusiak bertsolaritzaren mugimenduarentzat duen garrantziaz ariko dira eta bertsolaritza munduko ahozko inprobisazio kantatuen artean ere kokatuko dute.

 Denera 30 euskaltegitan 43 saio didaktiko izango dira, eta 1200 ikaslerengana iritsiko dira. Miranda de Ebrotik Maulera bitartean izango dira saioak. Eta irakasle lanetan ere bertsolariak ariko dira: Ainhoa Aranburu, Xasbi Paya, Beñat Vidal, Ruben Sanchez, Joanes Etxebarria, Amaia Agirre, Ainhoa Agirreazaldegi, Arkaitz Oiartzabal "Xamoa" eta Jokin Labayen.

• 
•