Lizardi sariketa 2007-09-05

Aitzol Barandiaranek irabazi du bigarren kanporaketa

Aitzol Barandiaranek lortu du bigarren txartela, atzo Jokin Labayenek bezala eta gainontzeko finalistak hauek dira: Unai Muñoa, Beñat Gaztelumendi, Mizel Mateo eta Oihana Bartra.

Beste zortzi bertsolari lehiatu ziren atzo Urpekoak elkartean eta Lizardiko finala erabakita geratu da beraz. Bakoitzak kanporaketa bana irabazita, Jokin Labayen eta Aitzol Barandiaran zuzenean sailkatu dira eta puntuaketa bidez berriz, Beñat Gaztelumendi, Mizel Mateo, Unai Muñoa eta Oihana Bartra.

Saio oso polita egin zuten atzoko zortzi bertsolariek, baina azkenean aurrez aipatutako sei  bertsolari horiek pasa ziren finalera. Aipagarria izan zen atzo Aitzol Barandiaranek osatutako saio borobila, oso fresko aritu zen Ataundarra eta diferentzia hasieratik markatu zuen. Antzeko freskuran eta hasieratik diferentzia markatzen hasi zen beste bat Arkaitz Oiartzabal "Xamoa" izan zen, baina poto bat eta hamarreko txikiko ariketan behera egin izanak finaletik kanpo utzi zuten, epaileek hala erabakita.

Beñat Gaztelumendik oso saio erregularra egin zuen eta tarteka asmatzearekin finaleko hirugarren txartela berak eskuratu zuen. Ez zen berdina izan Mizel Mateoren kasua, oso oso bertso politak osatu baitzituen, baina ihes egindako bertsoak ere izan ziren tartean.

Oihana Bartrak ez zuen gehiegi asmatu ideia eta freskotasun aldetik, hori baino gehiago badaki egiten, baina hutsik ez zuen egin eta epaileek finalerako azken txartela berari ematea erabaki zuten.

Sailkapena

Jokin Labayen (zuzenean)

Aitzol Barandiaran (zuzenean)

Beñat Gaztelumendi (205 p.)

Mizel Mateo (199'5 p.)

Oihana Bartra (196'5 p.)

Saioa laster izango da ikusgai Bertsoa.com-en eta finala ere bai, Bertsoaren plaza digitala Zarauzko Zinema frontoian izango baita ostiral honetan.

Albiste gehiago

Bizkaiko Bertsolari Txapelketa 2018-12-11

Final parekidea eta parekatua Bizkaian

Mintzola Ahozko Lantegiak eta Etxepare Euskal Institutuak 2018-12-05

What is Bertsolaritza? Bertsolaritza nazioartean aurkezteko ikus-entzunezkoa