Otsailean hasiko da 2014-01-30

Tolosaldeko herri arteko taldekako txapelketa antolatu du Harituzek

Tolosaldeko Harituz betsozaleen elkarguneak taldekako herri arteko txapelketa antolatu du eskualdean, bailarako elkar ezagutza eta bertso giroa zabaltzeko. Proposamenak oso harrera ona izan du eta hamaika herritan atera dira taldeak, hiruna bertsolarikoak. Beraz, 35-40 laguneko dinamika izango du Tolosaldeko eskualdeak ekimen honi esker. Otsailaren 14an hasiko da Altzon eta apirilaren 11ean jokatuko da finala Anoetan.  Taldea atera duten herriak: Alegi, Villabona (1), Anoeta, Larraul, Amasa, Andoain, Altzo, Berastegi, Tolosa, Zizurkil eta Billabona (2).

Momentu egokia antolatzeko
Arrazoi bat baino gehiago izan du Harituzek eskualdeko herri artekoa antolatzeko. Eskualde mailan oraindik elkar ezagutzan zer landua badagoela uste dute eta ekimen honek horretan lagundu dezakeelakoan daude.  Era berean, Harituz taldea bera ere sendotzea ere bada helburua, orain arte iritsi gabeko herrietara heltzea, eta saio gutxi dituzten bertsolarei plazak eskaintzea ere bai. Parte hartzaile zenbait, berriz, plazaratu gabeak izango dira eta pauso hori ematen lagungarri ere izango da Tolosaldeko taldekako txapelketa hau. Arrazoi horietaz guztietaz gain, Harituz taldeak uste du momentu egokia dela Tolosaldean izaera horretako ekimen bat antolatzeko.

• 
•